eng mahir chüsh tebirchisi

türkiye awazi radiyosi: zindan yüsüf eleyhissalamgha quduqtiki künlirini ésige saldi. yüsüf eleyhissalam zindanda pütün waqtini allahqa ibadet qilish bilen ötküzetti, uning zindanda nurghun dostliri bar bolup, bularning ichidiki ikkisi ilgiri xan sariyida ishligen chakarlardin idi.

bu ikkisi bir küni ghelite chüsh körüshti. ular yüsüf eleyhissalamning chüshlerge toghra tebir béreleydighanliqini biletti. shunga, yüsüf eleyhissalamdin körgen chüshilirige tebir bérishni ötünüshti. biri, chüshide üzüm siqqanliqini, yene biri, béshining üstidiki nanni qushlarning choqulap yégenlikini körgenidi.

ularning körgen chüshini anglighan yüsüf eleyhissalam üzüm siqip chüsh körgen zindandéshigha: «sen tekrar saraygha qaytip, padishahning xizmitini qilishni dawamlashturidikensen» dédi. yene birige bolsa: «sanga ölüm jazasi bérilidiken we qushlar béshinggha qonidiken» dédi.

 uzun ötmeyla yüsüf eleyhissalam tebir bergen chüshler rialliqqa aylandi. u ikki mehbustin birige ölüm jazasi bérilgen bolsa, yene biri, yüsüf eleyhissalamning éytqinidek saraygha qaytip padishahning xizmitini qilishni dawamlashturdi.

u künlerde misirning padishahi bir kéchisi chüsh kördi. chüshide bir deryaning boyida olturuwatatti. deryadin kütülmigende yette tuyaq sémiz kala sekrep chiqti, arqidinla yette tuyaq oruq kala sekrep chiqti. burun chiqqan yette sémiz kala kéyin chiqqan yette oruq kalini birdemdila yep ketti.

 padishah chüshidin qorqup oyghinip ketti. buning chüsh ikenlikini bilip erkin uh tartti, arqidinla qayta uyqugha gherq boldi. bu qétim yene chüsh kördi, chüshide yette bash yéshil we tolghan bughday bashiqi bilen yette bash qurup ketken bughdaq bashiqi kördi. quruq bashaqlar yéshil bashaqlarni yewatatti.

keyni - keynidin körgen bu chüshining choqum tebiri bolushi kérek idi. etisi etigende padishah ademlirini saraygha yighip mundaq dédi: «tünügün kéche körgen chüshümge tebir béringlar yaki bolmisa tebir béridighan birini tépip yénimgha chaqirip kélinglar.»

padishahning chüshige saraydikilerning birsimu toghra tebir bérelmidi, hemmisi charisizlarche jim bolup qélishti. sarayda öz waqtida yüsüf eleyhissalam bilen bir kamérda yatqan chakarmu bar idi. saraydikilerning padishahning chüshige tebir bérelmigenlikini körüp, tuyuqsiz xiyaligha yüsüf eleyhissalam keldi. chakar hayajanlinip ketti we derhal padishahqa  mundaq dédi: «men zindanda yatqan chéghimda chüshlerge nahayiti toghra tebir béreleydighan bilimi mol bir dostum bar idi, aliyliri ruxset qilsila chüshlirige u tebir bérip baqqan bolsa, qandaq deylikin.»

padishah uni derhal yüsüf eleyhissalamning qéshigha ewetti. yüsüf eleyhissalamning qéshigha kelgen chakar, padishahning körgen chüshini yüsüf eleyhissalamgha bayan qilip, uning tebir bérishini ötündi.

yüsüf eleyhissalam chüshke tebir bérishke bashlidi: «yette yil mol hosulluq we beriketlik yil bolidu, andin yette yil acharchiliq we qehetchilik yüz béridu. bu seweblik mol hosulluq yette yilda bughday, arpigha oxshash ziraetler bilen méwe - chiwige oxshash mehsulatlar hesslep térilishi, shundaqla ambarlar ashliqlar bilen toldurulushi kérek. qehetchilik we acharchiliq yillirida bolsa ambarlardiki ashliqlardin paydilansanglar bolidu, qehetchilik we acharchiliq yilliridin mushu xil chariler bilen qutulghili bolushi mumkin.»

padishahqa yüsüf eleyhissalamning bergen chüsh tebiri shundaq yaqti. chüshining heqiqiy tebirining bu ikenlikini bilip yetti we yüsüf eleyhissalamni sariyigha chaqirtti. yüsüf eleyhissalam üstün qabiliyiti, yüksek edeb - exlaqi we ésil peziliti bilen uzun ötmeyla padishahning eng ishenchilik we etiwarliq adimi bolup qaldi.

padishah qehetchilik we acharchiliq dewrde istémal qilinidighan ashliq we bashqa lazimetliklerni yighish we bashqurush ishlirini yüsüf eleyhissalamgha tapshurdi. shundaq qilip yüsüf eleyhissalam qudretlik bir memliketning ashliq ishlirini bashquridighan aliy mensep igisi bolup qaldi.

  mol hosulluq yillar ötüp qehetchilik we acharchiliq dewri bashlanghan idi. yüsüf eleyhissalamning misirdin uzaq diyar bolghan kenandiki atisi yaqub eleyhissalam bilen akilirimu bu tebiiy apetning tesirige uchrighan idi. shunga, inisi yüsüfni quduqqa tashliwetken akiliri bughday tépish üchün misirgha kélishkenidi.

ular qiyinchiliqlirini chüshendürüsh üchün ashliq ishlirigha mesul kishining huzurigha chiqishti, ularning aldidiki kishi del yüsüf eleyhissalam idi. yüsüf eleyhissalam uzun waqittin béri körmigen wapasiz we wijdansiz akilirini bir körüpla tonughan, biraq ular yüsüf eleyhissalamni tonuyalmighan idi.

akilirini qizghin kütüwalghan yüsüf eleyhissalam ulardin hal - ehwal sorighandin kéyin, bir tiyinmu heq almay ulargha hesslep bughday ajritip berdi. biraq ulardin bunyamin isimlik kichik inisining misirda qélishini ötündi. akiliri yüsüf eleyhissalamning telipige bir nerse déyelmey, inisining yusufning qéshida qélishigha qoshulup, kenangha qaytip kétishti.

yaqub eleyhissalam oghullirining inisi bunyaminni misirda qaldurup qoyghanliqini anglighandin kéyin ulargha: «yüsüfke ziyankeshlik qilghininglardek, kichik ininglar bunyaminghimu ziyankeshlik qilghan oxshimamsiler?» dédi qattiq qayghurghan halda.

 yaqub eleyhissalam oghullirini qaytidin yüsüf eleyhissalamning yénigha ewetti.

ular yüsüf eleyhissalamning huzurigha kirip kelginide, yüsüf eleyhissalam özining kim ikenlikini akilirigha ashkarilidi. akiliri buni uqup qattiq heyran qaldi we qorqup kétishti. biraq aq köngül we mihir - shepqetlik yüsüf eleyhissalam akilirini kechürüwetti we ularni atisi yaqub eleyhissalam we anilirini misirgha élip kélishke buyridi.

ular atisi yaqub eleyhissalam we bala - chaqilirini misirgha élip kélishti, yüsüf eleyhissalam uzun yilliq hijran azabidin kéyin atisi yaqub eleyhissalam bilen didarlashti. u uruq - tughqanlirigha: «allahning izni bilen misirda amanliq we xatirjemlik ichide olturaqlishinglar» dédi.

yüsüf eleyhissalamning akiliri inisining aliy mertiwisi we heywitini körüp özlirini gunahkar hés qilishti. yüsüf eleyhissalam atisi yaqub eleyhissalamgha: «i ata! öz waqtida körgen chüshümning tebiri mushu iken, ulugh perwerdigarim chüshümni rialiqqa aylandurdi» dédi.

shundaq qilip, yüsüf eleyhissalamning kichik waqtida quyash, ay we on bir yultuzning aldida hörmet bilen özige sejde qilip körgen chüshi rialliqqa aylanghan boldi.

buningdin körüwélishqa boliduki, sharait qanchilik qiyin bolup kétishtin qetiynezer allahtin ümid üzmeslik intayin zörürdur, shundaqla meyli zindanda bolsun, meyli sarayda bolsun, meyli bashqa waqitlarda bolsun, allahni zikir qilishni qetiy untup qalmasliq intayin muhimdur, chünki janabiy allah bendilirige intayin yéqindur.