xitay dunya soda teshkilatigha amérika üstidin erz sundi

türkiye awazi radiyosi xewiri: xitay soda ministirliqi amérika üstidin dunya soda teshkilatigha erz sunghanliqi toghrisida bayanat élan qildi.

xitay soda ministirliqining bayanatida, 2022 - yili amérika maqullighan pul paxalliqini töwenlitish qanuni arqiliq yerlik ishlepchiqarghuchilarni toluqlima bilen qollapla qalmay, xitay we dunya soda teshkilatigha eza bashqa döletlerdin import qilinghan mehsulatlarni bazardin siqip chiqiriwitishni bashlighanliqini hemde buning naheq riqabet shekillendürgenlikini ilgiri sürdi.

bayanatta, bu ijraatning tokluq aptomobil ishlepchiqirishtiki dunyawi sanaet we teminlesh zenjirige ziyan salghanliqi, erzning xitay ishlepchiqarghuchilarning menpeetini qoghdash we yer shari xaraktérlik yéngi énérgiye wastichiliq saheside adil riqabetni kücheytishni nishan qilidighanliqi bildürüldi.

bayanatta, dunya soda teshkilatining özi yaxshi köridighan yaki özige yéqin döletlerge alahide muamile qilishni chekleydighan qaidesige amérikaning xilapliq qilghanliqi tekitlinip, washington hökümitini ayrimchi toluqlima siyasitini tézdin tüzitip, yéngi énérgiye wastilirining dunya sanaet we teminlesh zenjirining muqimliqini qoghdashqa xizmet qildurushni chaqiriq qildi.

bayanatta, xitayning dunya soda teshkilati ezalirining iqtisadiy we ijtimaiy tereqqiyatni ilgiri süridighan qaidilirige riaye qilghan halda sanaet toluqlimisi belgilimirige hörmet qilidighanliqi uqturuldi.

xitay hökümitining yéngi énérgiye wastisini (NEV) dep atighanliqi, tok toluqlighili bolidighan, bataréye, arilash motor we yéqilghu bataréyelik tokluq aptomobillarning ishlepchiqirilishini dölet toluqlimisi bilen qollap kéliwatqanliqi melum.

yawropa ittipaqi komitéti yawropa aptomobil ishlepchiqarghuchilirigha naheq riqabet peyda qildi, dégen seweb bilen xitaydin import qilinghan tokluq  aptomobillargha qarita qoshumche tekshürüshni bashlighan idi.