ministir bolat qatarning türkiyediki sélinmiliri toghrisida toxtaldi
türkiye soda ministiri ömer bolat qatarning türkiyediki sélinma sommisining 20 milyard dollardin ashqanliqini bildürdi.
türkiye awazi radiyosi xewiri: türkiye jumhuriyiti soda ministirliqining maslashturushi bilen, türkiye éksportchilar mejlisi teripidin uyushturulghan türkiye- qatar soda ömiki we ikki terep soda söhbetliri qatarning paytexti dohada ötküzüldi.
ministir ömer bolat yighinning échilish murasimida söz qilip, özlirining «2023 – yilliq doha yermenkisi» we türkiye sariyining échilishi paaliyitige ishtirak qilish üchün, katta wekiller ömiki bilen qatargha kelgenlikini éytti.
türkiye bilen qatarning dost, qoshna we qérindash döletler bolupla qalmay, yene istratégiyelik shérikler ikenlikini otturigha qoyghan bolat, ikki döletning soda miqdarining yéqinda imzalighan soda kélishimliri sayisida ashidighanliqini tilgha aldi.
ministir bolat: «biz nöwettiki sommisi 2 milyard 300 milyon dollar bolghan özara soda we meblegh sélishlarning téximu ashidighanliqigha ishinimiz. türkiyedin qatargha zor derijide mebleghlar sélinmaqta, 727 türk shirkiti qatarda meshghulat élip barmaqta. qatarning 220 shirkiti türkiyede muhim türlerni üstige aldi. qatarning türkiyege salghan meblighi 20 milyard dollardin éship ketti» dédi.
türk höddigerlirining qatarning ul eslihelirini tereqqiy qildurushqa munasiwetlik chong türlerni üstige alghanliqi we 18- 19 milyard dollar qimmitidiki mulazimetni muweppeqiyetlik tamamlighanliqini tilgha alghan ministir bolat, türkiye bilen qatarning tereqqiyat yoli türidimu hemkarlishiwatqanliqini sözlirige ilawe qildi.
