türkiye roméniyege tebiiy gaz éksport qilidu

türkiye awazi radiyosi xewiri: turuba liniyeliri bilen néfit tiransport pay cheklik shirkiti (botash) bayanat élan qilip, «botash rayondiki chong énérgiye shirketlirining biri bolghan OMV Petrom bilen muhim kélishim imzalidi. künige töt milyon kub métir tebiiy gaz éksport qilishni mezmun qilghan, mudditi 2025 - yili 31 - mart toshidighan kélishim dairiside, türkiyedin roméniyege turuba liniyeliri arqiliq tebiiy gaz éksport qilish 10 - ayning 1 - küni bashlinidu» dégenlerni qeyt qildi.

herqaysi tereplerning tebiiy gaz sodisi bilen birge yetküzüsh, zapaslash, ishlepchiqirish we yéshil énérgiye téxnikisi qatarliq sahelerdiki hemkarliqni tereqqiy qildurush toghrisida kélishim hasil qilghanliqigha isharet qilinghan bayanatta: «hazirghiche turuba liniyeliri arqiliq rayon döletliridin girétsiye, bulghariye we wéngiriyege tebiiy gaz éksport qilish toghrisida muhim kélishimlerni tüzgen botash, gaz bilen teminleydighan döletlerge roméniyenimu qoshup, qoshna bazarlar we yawropadiki énérgiye bixeterliki we köp xilliqigha qoshqan töhpisini mustehkemlidi» dégen ibarilerge orun bérildi.

türkiye awghustta wéngiriye bilen, yanwarda bulghariye bilen tebiiy gaz éksport kélishimi imzalighanidi.