әнглийәниң иттипақтин айрилиши қанчә милйард доллар зийан кәлтүриду?

түркийә авази радийоси хәвири: башқуруш мәслиһәтчилик ширкити оливер вимән (Oliver Wyman) билән қанунчилиқ ширкити клифорд чанс (Clifford Chance) әнглийәниң келишим түзмәстин йавропа иттипақидин айрилғанда қанчилик зийан елип келидиғанлиқи тоғрисида доклат елан қилди. мәзкур доклатқа асасланғанда, әнглийә йавропа иттипақи билән келишим түзмәстин айрилған әһвал астида пул-муамилә саһәси әң чоң зийанға учрайдикән.

әнглийә 2019-йили йавропа иттипақидин чиқип кетиштин бурун бир келишим түзүлмисә, тәрәпләр дунйа сода тәшкилатиниң бәлгилимилириниң чәклимисигә учрайду вә таможна беҗи елиниду. буниңдин башқа, йавропа иттипақиға әза 27 дөләт таможна беҗи вә таможнидин башқа чәклимиләр сәвәбидин бир йилда җәмий 44 милйард доллар төләшкә мәҗбур болиду. бундақ болғанда, йавропа иттипақиға мал сатқан әнглийә експортчилириму һәр йили 36 милйард доллар төләшкә мәҗбур болиду.

баш вәзир тиреса мей әнглийә йавропа иттипақидин чиқип кәткәндин кейин, таможна иттипақида қелишиға қарши турмақта.

йавропа иттипақи комитети билән әнглийә оттурисида 2017-йили декабирда пуқралар һәқ-һоқуқи, йавропа иттипақиға төлинидиған төләмләр вә иреландийә арилидики чегра мәсилилирини өз ичигә алған темилардин тәшкил тапқан музакирәләрниң биринчи қетимлиқиға мунасивәтлик келишим түзүлгән иди.

йавропа иттипақи билән әнглийә оттурисида иттипақтин чиқип кәткәндин кейинки сода мунасивәтлири муһакимә қилинидиған иккинчи қетимлиқ музакирәләрниң келәр һәптә башлинидиғанлиқи күтүлмәктә.