amérikining tashqi soda qizil reqimi yéqinqi 9 yildin buyanqi eng yüksek sewiyege yetti
amérika qoshma ishtatlirining tashqi soda qizil reqimi dékabirda 53.1 milyard dollar bilen yéqinqi 9 yildin buyanqi eng yüksek sewiyege yetti.
türkiye awazi radiyosi xewiri: amérika soda ishliri ministirliqining bu heqte élan qilghan doklatigha asaslanghanda, amérikining tashqi soda qizil reqimi 2017 – yili dékabirda aldinqi ayning oxshash mezgilige sélishturghanda % 5.3 éship, 53.1 milyard dollargha yetken.
2008 – yildin tartip hazirghiche eng yüksek sewiyediki tashqi soda qizil reqimi 52 milyard dollar bolidu, dep békitilgen idi.
doklatta körsitilishiche, qizik reqemning éship kétishide, importning % 2.5 éship 265.5 milyard dollargha yétishi halqiliq rol oynighan. bu dewrde döletning éksporti aldinqi ayning oxshash mezgilige sélishturghanda % 1.7 éship 203.4 milyard dollargha yetken bolushigha qarimay qizil reqemning éship kétishige tosalghu bolalmighan. buningdin bashqa yene, amérikining yilliq omumiy tashqi soda qizil reqimi 2017 – yili 566 milyard dollar bilen 2008 – yildin buyanqi eng yüksek sewiyege yetken.
igilinishiche, amérika pirézidénti tramp töwenlitish toghruluq wede bergen bolushigha qarimay, qizil reqemning wezipige olturghan tunji yili 9 yildin buyanqi eng yüksek sewiyege yétishi, «aq sarayning iqtisadiy jehettin puxta tedbir qollinish siyasetliri ishqa yarimidi» teriqiside analiz qilinghan.