türkiye amérika tashqi ishlar ministirliqining kishilik hoquq doklatigha naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi bayanat élan qilip, amérika tashqi ishlar ministirliqining 2023-yilliq kishilik hoquq doklatida aldinqi yillardikige oxshashla türkiyege qarita asassiz eyibleshler, emeliyetke mas kelmeydighan uchurlar we bir tereplime qarashlargha orun bérilgenlikini tekitlidi.

bu yilmu «kélip chiqish menbesi éniqsiz sepsetiler bilen térrorluq teshkilatliri bilen chétishliqi bolghan tereplerning sözliri asasida teyyarlanghan» bu doklatning nezerge élinmaydighanliqigha isharet qilinghan bayanatta: «dölitimiz duch kéliwatqan köp tereplimilik, shundaqla éghir térrorluq tehditlirige qarimay, démokratiye, kishilik hoquq we qanun bilen bashqurush pirinsiplirida ching turidighanliqi toghrisidiki wediside qetiy ching turmaqta» dégen ibarilerge orun bérildi.

türkiyening qanunluq qoghdinish hoquqi dairiside élip bériwatqan térrorluqqa qarshi turush heriketlirining «pütünley térrorluq unsurliri we ular térrorluq paaliyetliride ishlitiwatqan jaylargha zerbe bérishni nuqta qilidighanliqi» otturigha qoyulghan bayanatta, «amérika qoshma ishtatlirining, térrorluqning barliq shekillirige qarshi dawamlashturuwatqan heqqaniy we yolluq küreshning dairisini yaxshi bilidighan bir ittipaqdash bolush süpiti bilen heqiqetni burmilighan tuturuqsiz sepsetilerde ching turuwélishini chüshinish mumkin emes» déyildi.

bayanatta yene: «biz yene bir qétim amérikaning diqqitini özining kishilik hoquq xatirisige merkezleshtürüp, térrorluq teshkilatliri bilen ornatqan hemkarliqliri bilen kishilik hoquq mesilisidiki qosh ölchemlik siyasitini axirlashturushqa chaqirimiz» dégen ibarilergimu orun bérildi.