istanbulda israiliyening wehshiyane hujumlirigha qarshi keng kölemlik namayish ötküzüldi

türkiye awazi radiyosi xewiri: insanperwerlik yardem fondi jemiyiti (IHH) teripidin uyushturulghan «ghezzeni untuma!» namliq piyade yürüshke, pelestinlik amérika puqrasi, ataqliq paaliyetchi huweyda arraf, ispaniyedin sabiq barsélona sheher bashliqi ada kolaw we amérikaliq sabiq diplomat shundaqla pénsiyonir polkownik en raytmu ishtirak qildi.

piyade yürüshke qatnashquchilar «hazir derhal urushni toxtat!» dep yézilghan lozunkilarni kötürüp mangdi.

pelestin azadliq birleshmisining bayanatchisi shundaqla pénsiyoniramérika eskiri en rayt ayasofya meydanida söz qilip: «biz ghezzediki qirghinchiliqni toxtitish üchün paraxotlirimizni yolgha chiqirimiz. ghezzediki insanperwerlik pajiesini toxtitish, acharchiliqqa duchar qilinghan kishilerge yémeklik yetküzüsh üchün yolgha chiqimiz. dunya rehberlirige xitab qilimen, bizler insanperwerlik meqsiti bilen yolgha chiqtuq» dédi.

namayishqa qatnashqan barsélonaning sabiq sheher bashliqi we kishilik hoquq paaliyetchisi ada kola: «barsélona israiliye bilen bolghan munasiwetlerni üzüp tashlighan eng chong sheherlerdin biri hésablinidu. bu yéterlik emes. yawropa rehberlirining ikki yüzlimichilikidin nomus qilimen, shunga men bu yerge keldim. men erkinlik üchün yolgha chiqqanlar bilen billimen. qorshawni buzup tashlishimizni ümid qilimen» dédi.

insanperwerlik yardem fondi jemiyiti (IHH) ijraiye  heyiti ezasi muhemmed jihat chelik söz qilip: «yette aydin buyan ishghaliyetke qarshiliq körsitiwatqan qehriman ghezze xelqi üchün bu yerdimiz. biz peziletlikler ittipaqi qurduq, dunyaning hemmila yéridin wijdanliq kishilerni buninggha qatnashturduq we nishanimizni qaytidin ghezzege toghrilaymiz, ghezzege barimiz, urush toxtitishta muhim rol oynaymiz, biz émbargolarni buzup tashlaymiz» dédi.