türkiye isirailiyege qarshi yéngi tedbirlerni yolgha qoyidu
tashqi ishlar ministiri xaqan fidan isirailiyege qarshi bir qatar yéngi tedbirlerni yolgha qoyushni qarar qilghanliqlirini éytti.
türkiye awazi radiyosi xewiri: tashqi ishlar ministiri xaqan fidan isirailiyening ghezzege qiliwatqan hujumliri we ghezzege insanperwerlik yardemlirini yetküzüsh toghrisida muhim bayanatlarni élan qildi.
u türkiyening ghezzege iyordaniye arqiliq ayropilan bilen insanperwerlik yardemlirini yetküzüsh telipining isirailiye teripidin ret qilinghanliqi üstide toxtaldi.
u: «isirailiye acharchiliq bilen boghushuwatqan ghezzeliklerge ayropilan bilen insanperwerlik yardemlirini yetküzüsh telipimizni ret qildi. bizmu isirailiyege qarshi bir qatar yéngi tedbirlerni yolgha qoyushni qarar qilduq» dédi.
u jumhur reis rejep tayyip erdoghan teripidin testiqlanghan bu tedbirlerni kéchiktürmestin qedemmu qedem ijra qilidighanliqlirini we munasiwetlik organlar teripidin jemiyetke élan qilinidighanliqini qeyt qildi.
u mundaq dédi:
«isirailiye urush toxtitishni élan qilghuche we insanperwerlik yardemlirining ghezzege üzüksiz shekilde yetküzülüshige ruxset qilghuiche bu tedbirlirimizni ijra qilimiz.»
u türkiyening déngiz we hawa yoli bilen ghezzege yetküzüsh üchün misirgha ewetilgen insanperwerlik yardemlirining 45 ming tonnadin éship ketkenlikini, türkiyening ghezzege eng köp insanperwerlik yardimi ewetken ikki döletning biri ikenlikini qeyt qildi.
u axirida, insanperwerlik yardemliri qachilanghan toqquzinchi paraxotning yolda ikenlikini bildürüp, xéli waqittin buyan insanperwerlik yardemlirining parashot bilen ghezzege yetküzülgenlikini eskertti.
