fidan: barliq tashqi siyaset qorallirini ishqa sélip, rayonning muqimliqigha kapaletlik qilimiz

türkiye awazi radiyosi xewiri: ministir xaqan fidan bir téléwiziye qanilining söhbet pirogrammisigha chiqip, türkiyening tashqi siyaset küntertipi toghrisida toxtaldi we munasiwetlik soallargha jawab berdi.

u iraqta élip bériliwatqan térrorizmgha qarshi küresh heqqide toxtilip: «bizning arzuyimiz sulaymaniyediki dostlirimizning pursetni qoldin bermey xataliqlirini tüzitip, tarixtikige oxshash bügünki kündimu türkiye bilen bolghan dostluqini kücheytishi we ortaq kelgüsige qarap birlikte heriket qilishimizdur» dédi.

ministir fidan özlirining erbil, sulaymaniye, baghdad, kerkük we mosulning kelgüsini u yerning ahalisi bilen «birlikte» berpa qilidighanliqlirini, u yerde térrorluq teshkilatlirigha orun yoqluqini tilgha élip: «biz hazir ularni sistémimizning sirtigha chiqiriwétishimiz kérek. bular ishlitilish mudditi ötüp ketken teshkilatlar. men tilgha alghan sheherler we medeniyetler qedimki medeniyetler bolup, ular ilgiri bu xil tehditlerni yengdi, inshaallah,  buningdin kéyinmu yéngidu» dédi.

u küntertipte téximu küchlük tedbirlerning bar yaki yoqluqi toghrisidiki bir soalgha: «siz méning düshminimni qollawatqan bolsingiz, méning némilerni qilishimni ümid qilattingiz? bizning bu jehettiki meydanimiz éniq. bu düshmenning sendin paydilinishining aldini élish méning mejburiyitim. men bu ishni qilimen. buni qilish jeryanida, men sanga hiyle, turaq qurmaymen, (hemme gepni) yüzüngge deymen, buningdin waz kech, chünki bu sen üchün paydiliq emes, héchkimge paydiliq emes. sulaymaniyediki xelq türkiyening dosti, ular térrorluq teshkilati (p k k) bilen munasiwiti bolidighan bir xelq emes» dep jawab berdi.

ministir fidan yene: «kurdistan wetenperwerler ittipaqining sulaymaniyediki rehberliki we uni teshkil qilghan etretning (bölgünchi térrorluq teshkilati) p k k bilen bolghan munasiwiti we semimiyiti, bizge nisbeten bir mesile bolushtin halqip, dölet bixeterlik tehditige aylandi... türkiye barliq tashqi siyaset qorallirini mas qedemde ishlitip, rayonning muqimliqigha kapaletlik qilidu» dégenlerni qeyt qildi.