fidan: yer bilen yeksan qiliwétilgen ghezze asasiy jehettin olturaqlishishqa uyghun ehwalda emes

türkiye awazi radiyosi xewiri: ministir fidan türkiye-ezerbeyjan-giruziye tashqi ishlar ministirlirining 9-nöwetlik yighinigha ishtirak qilish üchün barghan ezerbeyjanning paytexti bakuda «parchilanghan dunyani eslige keltürüsh» témiliq 11-nöwetlik «yershari baku munbiri» ishtirakchilirigha xitab qildi؛ u sözi jeryanida, israiliyening ghezzege qaratqan hujumliri toghrisida tepsiliy toxtaldi.

öktebirde islam hemkarliq teshkilatidiki xizmetdashlirigha <özlirining saqliniwatqan mesilisini bashqilarning hel qilishini kütüshning  ornigha, eza döletlerning bu qétim mesilini özi bir terep qilishi kéreklikini éytqanliqi>ni bildürgen fidan: «eksiche bolghanda israiliye, bizge bu zulumni unutturush üchün, téximu wehshiylerche zulumlarni qilidu» dédi.

islam hemkarliq teshkilati we ereb elliri ittipaqining pewquladde bashliqlar yighini netijiside qurulghan alaqilishish guruppisining küchi sayisida, xelqara jemiyetning mutleq köp qismining hazir «derhal urush toxtitish, tosalghusiz insanperwerlik yardimi we ikki döletlik hel qilish charisi»ni qollawatqanliqini otturigha qoyghan fidan, qoyuq diplomatik tirishchanliqlarning israiliyening ghezzediki urush jinayitini toxtitalmighanliqini, bügünge qeder ghezzede <köp sanliqi ayallar, balilar we yashanghanlar bolup, 31 mingdin artuq ademning shéhit> bolghanliqini eskertti.

«ghezze hazir weyran boldi, asasiy jehettin olturaqlashlishishqa uyghun emes ehwalda» dégen fidan, refah chégra éghizidiki insanperwerlik yardemlirining qamal qilinishining israiliye we uning qollighuchilirining menpeeti üchün xizmet qiliwatqanliqini tekitlidi.

1967-yilidin burunqi chégralarni asas qilip, toluq salahiyetlik pelestin dölitini qurushni nishan qilghan ikki döletlik hel qilish charisi emelge ashmay turup, bu mesilini hel qilghili bolmaydighanliqini bayan qilghan fidan, israiliye ikki döletlik hel qilish charisige emel qilmighachqa, hel qilghuch netijige érishishning mumkin bolmighanliqini, shunga bu qétim özlirining képillik méxanizmi teklipini otturigha qoyghanliqlirini bildürdi.