jumhur reis erdoghan pirézidént sisi bilen qoshma muxbirlarni kütüwélish yighini ötküzdi

türkiye awazi radiyosi xewiri: jumhur reis erdoghan dölet ishliri ziyaritide bolush üchün barghan misirda, pirézidént abdulfettah sisi bilen ayrim we wekiller ömekliri ara söhbetleshkendin kéyin ötküzülgen qoshma muxbirlarni kütüwélish yighinida söz qildi.

«ming yildin köprek tarixqa ige özara gireliship ketken tarix we medeniyetke ige türkiye bilen misirning, chongqur yiltiz tartqan bu mirastin ilham élip, munasiwetlirini munasip sewiyege yetküzüshke tirishiwatqanliqi»ni tekitligen erdoghan, sözini dawamlashturup: «eziz qérindishimni kéngesh yighinimizni ötküzüsh üchün, pat pursette enqerede ziyarette bolushqa teklip qildim. men bu ziyaretning munasiwetlirimizning yéngi burulush nuqtisi bolidighanliqigha ishinimen. soda we iqtisad hemkarliqimizning parawozini teshkil qilidu. bügünki söhbetlirimiz jeryanida, qisqa waqit ichide soda miqdarini 15 milyard dollargha yetküzüsh toghrisida birdeklik hasil qilduq. buningdin bashqa 3 milyard dollar etrapidiki sélinmining miqdarini ashurushni qarar qilduq؛ bu yönilishte tashlashqa bolidighan qoshumche qedemler heqqide pikir almashturduq.

mudapie sanaiti biz nahayiti zor yoshurun küchke ige bolghan bir sahe. misir mudapie sahesige zor miqdarda meblegh salmaqta. men misir bilen hemkarliship, ortaq türlerni tereqqiy qilduridighanliqimizgha ishinimen. biz yene suyuqlandurulghan tebiiy gaz, yadro we qayta hasil bolidighan énérgiye qatarliq sahelerdiki hemkarliqimizni tereqqiy qildurush toghrisidimu sözlishiwatimiz» dédi.

jumhur reis erdoghan misir bilen sayahet, maarip we medeniyet qatarliq sahelerdiki alaqini téximu kücheytish üchün tirishidighanliqini bildürdi.

qahirediki yunus emre institutining dunyadiki eng awat türk tili öginish kurslirining biri ikenlikini bildürgen erdoghan, ötken yili 22 ming misirliq oqughuchining türkche öginish kursigha tizimlitishining xushallinarliq ish ikenlikini sözlirige ilawe qildi.