fidan türkiye bilen liwiyening qérindashliq munasiwetke ige ikenlikini éytti
tashqi ishlar ministiri xaqan fidan türkiye-liwiye munasiwetlirining «yiltizi intayin chongqur bolghan qérindashliq munasiwet» ikenlikini éytti.
türkiye awazi radiyosi xewiri: tashqi ishlar ministiri xaqan fidan resmiy dölet ishliri ziyaritide boluwatqan liwiyede, milliy birlik hökümitining bash ministiri abdulhemid dibeybe bilen körüshkendin kéyin, muxbirlarni kütüwélish yighini ötküzdi.
u liwiyeni ziyaret qilghanliqidin xushal ikenlikini eskertip, türkiye-liwiye munasiwetlirining «yiltizi intayin chongqur bolghan qérindashliq munasiwet» ikenlikini bildürdi.
u ziyaritide bash ministir dibeybe bilen keng dairide nurghun mesililerni muzakire qilish pursitige érishkenlikini bildürüp: «türkiyening liwiyening zémin pütünlükini, muqimliqini we izchil qollaydighanliqini tekrarlidim. bolupmu bu jeryanda, ikki dölet otturisida qilniwatqan we qilinishi mumkin bolghan xizmetlerni muzakire qilduq» dédi.
u dibeybe bilen rayon xewpsizliki we muqimliqi mesililirinimu muzakire qilghanliqlirini eskertip: «afriqaning jenubida yüz bériwatqan toqunushlar, qiyinchiliqlar we ichki urushlar toghrisida türkiye-liwiye bolush süpitimiz bilen birlikte némilerni qilalaymiz, bularnimu muzakire qilduq. térrorluqqa, köchke we etkeschilikke qarshi küresh mesililiridimu özara hemkarliqlirimizni közdin kechürüsh pursitige ige bolduq» dédi.
u türkiye hawa yolliri shirkitining liwiyege qaytidin ayropilan sepiri bashlash mesilisidimu pikir birdeklikige ige bolghanliqlirini qeyt qildi.
u axirida, bu qétimqi liwiye ziyaritining xewpsizliktin iqtisadqiche, maariptin wiza mesililirigiche bolghan keng témilarda ünümlük axirlashqanliqini qeyt qildi.
مۇناسىۋەتلىك خەۋەرلەر
erdoghan eliyéw bilen téléfonlashti
jumhur reis rejep tayyip erdoghan ezerbeyjan pirézidénti ilham eliyéw bilen téléfonlashti.