erdoghan mehmet akif ersoyni xatirilesh yighinida söz qildi
erdoghan özlirining zulumgha süküt qilidighan gacha sheytanlardin bolmaydighanliqlirini, ghezze qatarliq barliq jaylardiki öltürülgen, sömürülgen we ézilgen kishiler üchün, heqiqet we heqqaniylar terepte turushni dawamlashturidighanliqlirini éytti.
türkiye awazi radiyosi xewiri: jumhur reis erdoghan paytext enqerede ötküzülgen istiqlal (musteqilliq) shairi mehmet akif ersoyni xatirilesh paaliyitidiki sözi jeryanida, israiliyening 7-öktebirdin buyan dawamlashturuwatqan ghezzediki wehshiylikige «toxta denglar» dégen shoari arqiliq naraziliq bildürgen yashlarni yene bir qétim tebriklidi.
u özlirining zulumgha süküt qilidighan gacha sheytanlardin bolmaydighanliqlirini, ghezze qatarliq barliq jaylardiki öltürülgen, sömürülgen (éksplatatsiye qilinghan) we ézilgen kishiler üchün, heqiqet we heqqaniylar terepte turushni dawamlashturidighanliqlirini tekitlidi.
türkiyening térrorluqqa qarshi turush kürishi toghrisidimu toxtalghan erdoghan: «hemme shuninggha ishinishi kérekki, musteqilliqimizgha qaritilghan hujumlar dawamlishidighanla bolsa, bizmu kelgüsimizni qoghdash kürishimizni dawamlashturimiz» dégenlerni qeyt qildi.
u sözi jeryanida yene, ittipaqliq we barawerlikning ehmiytini tekitlep: «türkiye bizning ortaq wetinimiz, ortaq ögzimiz. biz hemmimiz birmiz, qérindashmiz, barawermiz. türkiyening kord, sünniy we alewiylerdin terkib tapqan 85 milyon nopusi bir gilemning güllirige oxshaydu» dédi.
