erdoghan bilen orban budapéshtta qoshma muxbirlarni kütüwélish yighini ötküzdi

türkiye awazi radiyosi xewiri: jumhur reis erdoghan budapéshtta wéngiriye bash ministiri wéktor orban bilen birlikte ötküzgen qoshma muxbirlarni kütüwélish yighinidiki sözi jeryanida, ghezzening nöwettiki weziyiti toghrisida toxtilip: «biz pütün küchimiz bilen israiliyening ghezzediki wehshiylikini tügitish üchün tirishiwatimiz. biz türkiye bolush süpitimiz bilen, tunji kündin bashlapla urush toxtitish we düshmenlishishke xatime bérish üchün, küchlük diplomatik tirishchanliq körsitiwatimiz» dédi.

erdoghan xelqara jemiyetnimu mesuliyetchanliq bilen heriket qilishqa chaqirip, musteqil, igilik hoquqluq we zémin pütünlükige ige pelestin dölitining qurulushining muqerrer ikenlikini otturigha qoydi.

u rusiye-ukraina urushini tilgha élip, zorawanliqning mesilini hel qilishning charesi emeslikige isharet qilghan halda: «biz bashtin-axir ukrainadiki saqliniwatqan mesilige diplomatik chare tépish tirishchanliqlirigha ehmiyet bérish kéreklikini tekitlep kéliwatimiz. türkiye bolush süpitimiz bilen, eger terepler telep qilghan teqdirde, yérim yolda toxtap qalghan istanbul musapisini eslige keltürüshke teyyarmiz» dédi.

erdoghan kélishimlerni tüzüsh arqiliq türkiye bilen wéngiriye otturisidiki rishtini téximu kücheytishni meqset qiliwatqanliqlirini, türkiye bilen wéngiriyening birleshme soda komitéti qurghanliqini élan qildi we sözini dawamlashturup: «bu yilning aldinqi 11 éyida soda miqdarimiz bulturqidin éship, 4 milyard dollargha yéqinlashti, bizning 6 milyard dollarliq ortaq nishangha yétish iradimiz qetiy» dédi.

bash ministir orban yawropa ittipaqining wizini erkinleshtürüsh mesiliside wéngiriyening türkiyeni qollaydighanliqini bildürdi.

u jumhur reis erdoghanning aldimizdiki esir üchün (türkiye esiri) din ibaret katta bir türni otturigha qoyghanliqigha isharet qilip: «kelgüsi yüz yil silerning bolidu. biz buninggha ishenduq, shunglashqa bu kélishimlerni tüzduq» dégenlerni qeyt qildi.

qoshqa muxbirlarni kütüwélish yighinidin ilgiri, türkiye bilen wéngiriye otturisida 16 türlük kélishim imzalandi.