sobaji: dunyaning herqaysi jayliridiki mezlumlarning sadasi bolduq
türkiye radiyo-téléziye idarisi- t r t (TRT) bash mudiri mehmet zahid sobaji dunyaning herqaysi jayliridiki mezlumlarning sadasi bolghanliqlirini éytti.
türkiye awazi radiyosi xewiri: t r t bash mudiri mehmet zahid sobaji dunyaning herqaysi jayliridiki mezlumlarning heq – hoquqlirini qoghdash we sadasi bolush üchün «özige xas küchlük tarqitish pirogrammiliri arqiliq küchlük tesir qozghash» istratégiyesige asasen tarqitish – anglitish paaliyetlirini élip bériwatqanliqlirini tekitlidi.
sobaji «birlikte tereqqiy qilish – mesuliyetler, paaliyetler we saqliniwatqan mesililerni hel qilish chare – tedbirliri» témisida istanbulda chaqirilghan 7 – nöwetlik 2023 – yilliq «‹TRT World› munbiri» yighinining échilish nutqida, uda ikki kün dawamlishidighan, texminen 100 dölettin 150 din artuq liksiye sözligüchi we 1000 din artuq kishi qatnishiwatqan yighinda, rayon we dunyawi mesililer heqqide muhekime élip bérilip, saqliniwatqan mesililerni hel qilish chare – tedbirliri heqqide pikir – tekliplerning otturigha qoyulidighanliqini éytti.
10-ayning 7-künidin bashlap israiliyening ghezzede irqiy qirghinchiliq yürgüzüwatqanliqini qeyt qilghan sobaji, xelqara taratqularning bu irqiy qirghinchiliqni qanunlashturmaqchi boluwatqanliqigha shahit bolghanliqlirini tekitlidi.
sobaji t r t bolush süpiti bilen, küchlük – ajiz dep ayrimastin, heqqaniyet pirinsipigha asasen xewerchilik, tarqitish – anglitish paaliyetlirini dawamlashturuwatqanliqlirini éytti, shundaqla t r t ning döletlik we xelqaraliq téléwiziye qanalliri, radiyo istansiliri we digital supiliri arqiliq dunyada yoqqa chiqiriwétilgen milyardlighan kishilerning sadasi bolush pirinsipigha asasen heriket qiliwatqanliqlirini tekitlep mundaq dédi:
«dunyaning herqaysi jayliridiki mezlumlarning heq – hoquqlirini qoghdash we sadasi bolush üchün <özige xas küchlük tarqitish pirogrammiliri arqiliq küchlük tesir qozghash> istratégiyesige asasen tarqitish – anglitish paaliyetlirini élip bériwatimiz. chünki biz dunyaning zéhinlirini bésiwalghan qamallarni bikar qilishning del waqti yétip keldi dep qaraymiz. derweqe, bügünki künde, nurghun döletlerdiki insanlar ghezzediki özgirishlerdin del waqtida xewerdar bolush üchün, t r t we türkiyening téléwiziye qanallirini körmekte, radiyolirini anglimaqta. tarixning qarangghu tertipidin orun élishni xalimaydighan wijdanliq kishilerning hemmisi türkiyening sadasi we meydanidin uzuqlanmaqta.»
