ghezzedin türkiye puqralirini tarqaqlashturush xizmiti dawamlashmaqta
israiliyening hujumliri sewebidin ghezzedin tarqaqlashturulghan 130 türkiye puqrasi we ularning aile tawabiatliri misir arqiliq istanbulgha keldi.
türkiye awazi radiyosi xewiri: «refah chégra éghizi» din misirgha ötken türkiye puqraliri olturghan we qahire ayrodurumidin qozghalghan türkiye hawa yolliri shirkitining ayropilani istanbul ayrodurumigha qondi.
ayrodurumda ularni türkiye tashqi ishlar ministirliqi wekilliri bilen jiddiy ehwallargha taqabil turush qomandanliq merkizining mesulliri qarshi aldi.
pasport tekshürüshidin kéyin, bir qisim puqralar mexsus aptomobillar bilen ayrodurumdin ayrildi. bashqa wilayetlerge baridighan puqralar bolsa, aptobus bilen jiddiy ehwallargha taqabil turush qomandanliq merkizi teripidin békitilgen méhmanxanilargha orunlashturuldi.
israiliyening 11-ayning 5-küni ghezze rayonining merkizige jaylashqan «elmeghazi musapirlar lagéri» gha qilghan hujumida töt balisi we üch qérindishi ölüp ketken anadolu agéntliqining opératori muhemmed elelul, uning yaridar ayali we bir balisimu istanbulgha keldi.
buningdin bashqa yene, anadolu agéntliqining ghezzediki ish béjirish ornida ishlewatqan zhurnalistlarning hayat qalghan aile tawabiatlirimu türkiye puqraliri bilen birlikte istanbulgha keldi.
