ghezzediki bezi bimarlar türkiyege yötkep kélindi
ghezzedin yötkelgen rak bimarliri we ularning hemrahlirini élip uchqan ikki ayropilan, türkiyege yétip keldi.
türkiye awazi radiyosi xewiri: misirning el arish ayrodurumidin kökke kötürülgen ikki ayropilan, paytext enqerening esenbogha ayrodurumigha qondi.
sehiye ministiri fahrettin koja ghezzege qilinidighan sehiye yardemliri dairiside, bimarlar we yaridarlarni türkiyege élip kélish üchün tünügün (15-noyabir) misir bilen élip barghan qoyuq alaqe netijiside bezi bimarlar bilen birge misirdin enqerege qaytip keldi.
türkiye jumhur reislik mehkimisi we dölet mudapie ministirliqining ayropilanliri misirning el arish ayrodurumidin bezi bimarlarni élip esenbogha ayrodurumigha yétip keldi. ayropilanda, bimarlargha türkiyelik toqquz mutexessis doxturning hemrah bolghanliqi bildürüldi.
sehiye ministiri fahrettin koja ghezzedin 27 bimar we ularning 13 hemrahini türkiyege élip kélish bilen, muhim qedem basqanliqini bildürüp, ghezzediki bimarlarni türkiyege ekilish üchün téximu köp tirishchanliq körsitidighanliqlirini qeyt qildi.
u: «7-öktebir (2023) din buyan misir arqiliq ikkinchi döletke bimar ewetilmidi. bu bimarlar tunji bolup reafah chégra éghizidin ötkendin kéyin biwaste türkiyege élip kélindi» dédi.
