numan qurtulmush shiwétsiye parlaménti bashliqi andirias norlén bilen körüshti

türkiye awazi radiyosi xewiri: türkiye büyük millet mejlisi (t b b m) bashliqi qurtulmush özining shiwétsiyening shimaliy atlantik ehdi teshkilati — natogha eza bolushigha munasiwetlik jeryanni bashtin-axir nahayiti yéqindin közitip kéliwatqanliqini, bu jeryanni baldurraq tamamlashni ümid qilidighanliqini éytti.

türkiye jumhuriyiti jumhur reislik mehkimisining shiwétsiyening natogha eza bolushigha munasiwetlik höjjiti qoligha tegkendin kéyin, uni derhal imzalap, türkiye büyük millet mejlisi tashqi ishlar komissiyonigha ewetkenlikini bildürgen qurtulmush, buninggha munasiwetlik qanun layihesining mushu hepte ichide komissiyonda muzakire qilinishining pilanliniwatqanliqini eskertti.

u, eger teklip komissiyon teripidin maqullansa, uning türkiye büyük milliy mejlisi omumiy kéngishide muzakire qilinidighanliqini we axirqi qararning parlamént ezalirining erkin iradisi bilen chiqirilidighanliqini tekitlidi.

türkiye büyük millet mejlisi bashliqi qurtulmush sözini dawamlashturup, shiwétsiyening özi wede qilghan «térrorizmgha qarshi küreshni qollash», «islamning muqeddeslirige hujum qilishqa yol qoymasliq» qatarliq mesililerde  aktip pozitsiye bilen heriket qilidighanliqigha toluq ishinidighanliqini tilgha élip ötti.

p y d / y p g we fethullahchi térrorluq teshkilati qatarliq térrorluq teshkilatlirigha qarshi küreshni birlikte élip bérishni telep qilghan qurtulmush, finlandiyege oxshash shiwétsiyeningmu térrorluq teshkilatlirigha yol qoymasliqini ümid qilidighanliqini bildürdi.

qurtulumush, türkiye-yawropa munasiwitimu muzakire qilinghan söhbet jeryanida, shiwétsiyening türkiyening yawropa ittipaqigha eza bolush musapisini qollishini ümid qilidighanliqini otturigha qoydi.

u, israiliyening ghezze we pelestin sheherlirige qaratqan hujumlirimu muzakire qilinghan söhbet jeryanida, xelqara jemiyetning ghezze üchün awazini yuqiri kötürüshi kéreklikini tekitlep, ghezzede derhal urush toxtitip, insanperwerlik yardem karidori ornitishning texirsizlikini tekitlidi.

norlénmu türkiyening shiwétsiye parlaménti üchün intayin muhim dölet ikenlikini we hemkarliq dairisini kéngeytishni sewrsizlik bilen kütüwatqanliqini éytti.

u, türkiye büyük millet mejlisi bashliqi qurtulmushni shiwétsiyege teklip qildi we uni shiwétsiye parlaméntida kütüwélishtin xushalliq hés qilidighanliqini qeyt qildi.