bügün mustapa kamal atatürkning wapatigha 85 yil bolghan kün...

türkiye awazi radiyosi xewiri: türkiye jumhuriyitining qurghuchisi mustapa kamal atatürk wapatining 85 yilliqida, memliket miqyasida, shimaliy qibris türk jumhuriyiti we chet ellerdiki elchixana-konsulxanilarda her xil murasimlar bilen xatirilesh paaliyetliri ötküzüldi.

paytext enqerede, dölet erkanliri atatürk xatire sariyini ziyaret qildi. jumhur reis rejep tayyip erdoghan bashchiliqidiki heyet atatürkning qebrisige gülchembirek qoydi.

rejep tayyip erdoghan xatire sariyidiki béghishlima deptirige: «eziz atatürk wapatingizning 85-yilida sizni, sepdashliringizni, wetinimiz üchün qéni tupraqqa tökülgen qehriman shéhitlirimizni, ortaq ghaye üchün qan tökken ghazilirimizni minnet bilen yad étimiz. türkiyening yüksélishige, türkiye esirining qurulushigha we xelqimizning bir esirdiki nishanigha yétishige héchqandaq küch tosqunluq qilalmaydu» dep yazdi.

türkiye büyük millet mejlisi (parlaménti) ning bashliqi numan qurtulmush atatürk wapatining 85 yilliqi munasiwiti bilen bayanat élan qildi.

u: «türkiye büyük millet mejlisining birinchi reisi, jumhuriyitimizning qurghuchisi ghazi mustapa kamal atatürk wapatining 85-yilida, uni hörmet bilen esleymiz. rohi shad bolsun. eziz wetinimiz üchün qanlirini pida qilghan shéhitlirimizning, ghazilirimizning makani jennet bolsun» dédi.

numan qurtulmush atatürk xatire sariyi ötküzülidighan resmiy murasimgha we jumhur reislik mehkimisidiki xatirilesh pirogrammisigha qatnishidu.

tashqi ishlar ministiri xaqan fidanmu atatürk wapatini xatirilep, éks (X) adrésida uchur hembehrlidi.

u: «milliy tashqi siyasitimiz arqiliq dölitimizning igilik hoquqini we musteqilliqini téximu kücheytish iradimizni, bu wesile bilen yene bir qétim namayan qilimiz. ghazi mustapa kamal atatürk bashchiliqidiki azadliq urushining barliq qehrimanlirini minnet we rehmet bilen esleymen» dédi.

diniy ishlar idarisimu atatürk wapatining 85 yilliqi munasiwiti bilen, «100-yilini tebrikligen jumhuriyetning qurghuchisi ghazi mustapa kamal atatürkni hörmet we minnet bilen esleymiz »dep télégramma élan qildi.