qurtulmush: pütkül dunya «ghezze qetliami» aldida süküt qiliwatidu
türkiye büyük millet mejlisi (parlaménti) reisi numan qurtulmush pütkül dunyaning bir chaghlarda «srébrénitsa qetliami» aldida süküt qilghinidek, bügünki kündimu «ghezze qirghinchiliqi» aldidimu süküt qiliwatqanliqini éytti.
türkiye awazi radiyosi xewiri: birqatar uchrishishlarda bolush üchün tünügün (2-noyabiyr) bosniye – gértségowinagha yétip barghan türkiye büyük millet mejlisi reisi numan qurtulmush, bosniye - gértségowina islam ittipaqi ölimalar birlikining reisi hüseyin éf kazanowich bilen körüshti.
sarayéwudiki bosniye - gértségowina islam ittipaqi binasida emelge ashurulghan uchrishishqa, sabiq dölet mudapie ministiri, türkiye büyük millet mejlisi dölet mudapie komitétining bashliqi xulusi aqarmu qatnashti.
qurtulmush uchrishishta söz qilip, balqan rayoninng muqimliqining, bolupmu bosniye-gértségowinaning zémin pütünlüki we igilik hoquqining türkiye üchün nahayiti zor ehmiyetke ige ikenlikini tekitlep mundaq dédi:
«shu wejidin, türkiye buni buzup tashlaydighan herqandaq bir qedemge qanuniy jehettin esla yol qoymaydu.»
bosniye - gértségowina islam ittipaqi ölimalar birlikining reisi hüseyin éf kazanowich israiliyening hujumliri dawamida, ghezze rayoni we iyordan deryasining gherbiy qirghiqidiki pelestinliklerning éghir talapetke uchrawatqanliqini hemde qirghinchiliqqa duch kéliwatqanliqini eskertip, bu heqtiki sezgürlüki üchün numan qurtulmushqa teshekkür éytti. qurtulmush insaniyet dunyasining pelestin mesiliside éghir sinaqni bashtin kechürüwatqanliqini tekitlep mundaq dédi:
«pütkül dunya bir chaghlarda <srébrénitsa qetliami> aldida süküt qilghanidi, bügünki kündimu <ghezze qirghinchiliqi> aldida sükütke chömmekte, jümlidin, ghezzede 10 ming kishining jénigha zamin bolghan, milyonlarche nopusqa ige rayon toxtawsiz bombardiman qiliniwatqan, bigünah puqralar qetl qiliniwatqan wehshiylik aldida sükütte turmaqta.»
numan qurtulmush «srébrénitsa qetliami» dikige oxshashla «irqiy qirghinchiliq» ning jawabkarlirining hem jinayet sadir qilghuchilar, hemde qollighuchilar ikenlikini, buning «ghezze qetliami» üchünmu küchke ige ikenlikini qeyt qildi.
qurtulmush bilen türkiye büyük millet mejlisi wekiller ömiki, bosniye – gértségowinaning tunji pirézidénti eli izzetbégowichning kowachi shéhitliri maziridiki qebrisini ziyaret qildi, gül – chécheklerni qoydi we dua qildi.
qurtulmush yene, merhum eli izzetbégowichning u hayat waqtida sarayéwuda turghan öyini ziyaret qildi we démokratik heriket partiyesining reisi bakir izzetbégowich bilen körüshti.
igilinishiche, türkiye büyük millet mejlisi reisi numan qurtulmush bosniye-gértségowinadiki ikki künlük ziyariti dairiside, bügün (3-noyabir) bosniye-gértségowina parlamént ezaliri mejlisining her ikki qanitidiki palata ezaliri bilen bir yerge jem bolidiken.
