koja: türkiye-pelestin dostluq doxturxanisi üchün heriketke ötülidu

türkiye awazi radiyosi xewiri: sehiye ministiri fahrettin koja ammiwi ortaqlishish tor bétidiki sehipiside élan qilghan bayanatida, ghezzediki türkiye teripidin sélinghan türkiye-pelestin dostluq doxturxanisining etrapining tünügün (30-öktebir) shu jay waqti saet 23:00 etrapida bombardiman qilinghanliqini tekitlep mundaq dédi:

«etrapi qattiq bombardiman astida qalghan türkiye-pelestin dostluq doxturxanisi ghezzediki birdinbir rak késellikliri doxturxanisi bolup, bimarlarning hazir bu doxturxanida dawalinishtin bashqa héchqandaq tallash yoli yoq. ölüm girdabigha bérip qalghan rak bimarlirining doriliri alliqachan tügep ketken. doxturxana xadimlirining doxturxanigha bérish-kélishi, qutquzush mashinilirining bimarlarni doxturxanigha apirishi asasiy jehettin mumkin emes. bumu hemmige ayan, elwette.»

«dölitimizning ghezzede salghan rak késellikliri doxturxanisining mulazimitini dawamlashturushigha kapaletlik qilish üchün heriketke ötülidu. bir doxturxanining etrapida heriketlinidighan hemme nersini bombardiman qiliwatqanlar, insanlarning wijdan mehkimiliride jawabkarliqqa tartilishqa teyyarlinishliri kérek.»

pelestinning resmiy xewer agéntliqi «WAFA», ghezzediki türkiye-pelestin dostluq doxturxanisining israiliyening bomba hujumigha uchrighanliqini bildürgenidi.

hamasning herbiy qaniti bolghan qassam birigadiliri 7-öktebir shenbe küni israiliyege qarshi «eqsa topani» namliq keng kölemlik hujum qozghighanliqlirini élan qilghanidi. ghezzedin israiliyege minglighan rakétamiyot étilghan, qoralliq guruppilarmu rayondiki olturaq rayonlargha bésip kirgenidi.

israiliye armiyesi bolsa, urush ayropilanliri bilen ghezze shehirige «tömür qilich herikiti» qozghighanliqlirini bildürgenidi.

igilinishiche, barghanséri keskinlishiwatqan toqunushlarda her ikki tereptin minglarche kishi jénidin ayrilghan.