erdoghan bilen berdimuhemmedow enqerede muxbirlarni kütüwélish yighini ötküzdi

türkiye awazi radiyosi xewiri: jumhur reis erdoghan türkiyede dölet ishliri ziyaritide boluwatqan türkmenistan pirézidénti serdar berdimuhemmedow bilen türkiye jumhuriyiti jumhur reislik mehkimiside ayrim uchrishish ötküzdi.

ikki dölet wekiller ömeklirining söhbiti axirlashqanda, türkiye bilen türkmenistan otturisida bir qatar kélishimler imzalandi؛ imza murasimidin kéyin, erdoghan bilen berdimuhemmedow qoshma muxbirlarni kütüwélish yighini ötküzdi.

jumhur reis erdoghan yighindiki sözide, bu ziyaretning berdimuhemmedowning pirézidént salahiyiti bilen türkiyege qilghan tunji ziyariti bolushi nuqtisidin nahayiti muhim ikenlikini tilgha élip: «bizning ortaq tarix, til, din we medeniyetni asas qilghan munasiwitimiz, özara hörmet qilish, hemkarliq we ortaq menpeetlerni chöridigen halda künséri küchiyip tereqqiy qilmaqta» dédi.

u söhbet jeryanida, ikki dölet munasiwetlirining her qaysi tereplirining keng dairide muhakime qilinip, hemkarliq pursetlirining muzakire qilinghanliqini, özlirining yene berdimuhemmedow bilen türkmenistanning daimiy biterplik salahiyitini chöridigen halda, ghezzeni öz ichige alghan rayon duch kéliwatqan nöwettiki mesililer heqqide pikir almashturghanliqlirini bildürdi.

erdoghan özlirining türkmenistan bilen nurghun mesililerde oxshash köz qarashta ikenlikini tilgha élip: «dunyada, bolupmu rayonimizda nöwette yüz bériwatqan ishlar türk döletliri teshkilati bayriqi astida birlishishimizning muhimliqini körsitip berdi. biz türk döletliri teshkilatining közetküchi ezasi bolghan türkmenistanni aile kéngishimizning toluq ezasi bolghanliqini körüshni xalaydighanliqimizni yene bir qétim tekitlep ötimen» dédi.

türkmenistanning musteqilliqini étirap qilghan tunji dölet — türkiyening, musteqil bolghandin buyan izchil halda türkmen qérindashlirini qollap kelgenlikini we buningdin kéyinmu shundaq qilidighanliqini bildürgen erdoghan, türkiye bilen türkmenistan otturisidiki rishtining imzalanghan 13 türlük kélishim arqiliq téximu roshen gewdilengenlikini otturigha qoydi.

türkmenistan pirézidénti serdar berdimuhemmedowmu dostluq, hörmet we özara barawerlik pirinsipigha tayanghan istratégiyelik ehmiyetke ige türkmenistan-türkiye hemkarliqini tereqqiy qildurush we kücheytishke teyyar ikenlikining jezmleshtürülgenlikini qeyt qildi.

pirézidént berdimuhemmedow erdoghan bilen türkmen gazi we éléktir énérgiyesini kaspiy déngizi arqiliq türkiyege yetküzüsh mesilisini muzakire qilghanliqini bildürdi we ikki terep soda miqdarini ashurushning ehmiyitini tekitlep ötti.

jumhur reis erdoghan pirézidént berdimuhemmedowning sheripige kechlik ziyapet berdi.