erdoghan shiwétsiyening natogha eza bolushigha dair qarar layihesini imzalidi

türkiye awazi radiyosi xewiri: türkiye jumhuriyiti jumhur reislik mehkimisi uchur – alaqe ishliri idarisining ammiwi ortaqlishish tor bétidiki sehipiside, bu heqte élan qilinghan bayanatida, mundaq déyildi: 

«shiwétsiyening shimaliy atlantik ehdi teshkilati-natogha eza bolushigha munasiwetlik qarar layihesi jumhur reis rejep tayyip erdoghan teripidin 2023-yili 23-öktebir küni imzalinip, türkiye büyük milliy mejlisige yollandi.»

shiwétsiye bash ministiri ulf kiristérson jumhur reis rejep tayyip erdoghanning shiwétsiyening natogha eza bolushigha munasiwetlik qarar layihesini imzalishidin xursen bolghanliqini bildürdi.

kiristérson ammiwi ortaqlishish tor bétidiki sehipiside, bu heqte élan qilghan bayanatida mundaq dédi:

«türkiye jumhuriyiti jumhur reisi rejep tayyip erdoghanning shiwétsiyening natogha eza bolushigha munasiwetlik qarar layihesini imzalap türkiye büyük dölet mejlisige sunghanliqidin intayin xursenmiz. emdi nöwet türkiye büyük millet mejlisige keldi. natogha eza bolushni töt köz bilen kütüwatimiz.»

nato bash katipi jéns stolténbérgmu jumhur reis rejep tayyip erdoghanning shiwétsiyening natogha eza bolushigha munasiwetlik qarar layihesini imzalighanliqi we türkiye büyük dölet mejlisige sunghanliqidin intayin xursen ikenlikini bildürüp mundaq dédi:

«shiwétsiyening natogha eza bolushigha munasiwetlik qarar layihesining türkiye büyük millet mejliside téz awazgha qoyulushini we shiwétsiyening pat yéqinda natogha eza bolushini töt köz bilen kütüwatimiz. hepte axirida jumhur reis rejep tayyip erdoghan bilen körüshkendimu éytqinimdek, shiwétsiyening natogha eza bolushi barliq ittipaqdash döletlerni téximu mustehkem we téximu bixeter qilidu.»

amérika qoshma ishtatliri tashqi ishlar ministirliqi bayanatchisi matéw millér mundaq dédi:

«biz buningdin intayin xursenmiz. bu  qarar layihesining türkiye büyük dölet mejliside baldurraq muzakire qilinishini we maqullinishini ümid qilimiz.»