түркийә американиң венезуела тоғрисидики қарарини қарши алди

түркийә авази радийоси хәвири: түркийә җумһурийити ташқи ишлар министирлиқи йазма байанат елан қилип: «биз боливарчи венезуела җумһурийити һөкүмити билән иттипақлиқ суписи вәкилликидики венезуела өктичилирини 17- өктәбир барбадоста имзаланған <сийасий һоқуқни қоллаш вә барлиқ кишиләрниң сайлаш – сайлиниш һоқуқиға капаләтлик қилиш вә дөләт мәнпәәтини қоғдаш> тоғрисидики келишимлири мунасивити билән тәбрикләймиз» деди.

түркийәниң, зөрүр дәп қаралған тәқдирдә, 2024 – йили венезуелада өткүзүлидиған сайламларниң демократик пиринсипларға уйғун келидиған шәкилдә очуқ – ашкара вә адил өткүзүлүши үчүн венезуела даирилиригә йардәм беришкә тәййар икәнлики оттуриға қойулған байанатта: «биз америка қошма иштатлириниң венезуелаға қаратқан җазаларниң бикар қилиниши тоғрисидики байанатини <тоғра йөнилиштә ташланған бир қәдәм> дәп қараймиз» дейилди.

байанатта йәнә: «түркийә җумһурийити бир тәрәплимә җазаларға қарши пиринсипал мәйданини сақлап келиватқан болуп, достимиз венезуеланиң илгирикигә охшашла бүгүнму йенидидур» дегән ибариләргиму орун берилди.

америка венезуела һөкүмити билән өктичиләр 2024- йили сайлам өткүзүш тоғрисида келишим һасил қилғандин кейин байанат елан қилип, венезуеланиң нефит, тәбиий газ вә алтун саһәлиригә қаритилған бир қисим җазаларни вақтинчә тохтатқанлиқини елан қилғаниди.