koja: ghezzege sehiye xizmiti sunushqa teyyarmiz

türkiye awazi radiyosi xewiri: sehiye ministiri fahrettin koja éks (X) adrésida bayanat élan qilip, ministirliqning ghezzege sehiye xizmiti sunush üchün heriketke ötkenlikini we bu dairide xelqaraliq sehiye teshkilatliri bilen uchrishishlarning dawamlishiwatqanliqini qeyt qildi.

ghezzediki elehli baptist doxturxanisigha qilinghan insaniyetke xilap hujumdin kéyin, dunya sehiye teshkilatining eng yuqiri mesullirini öz ichige alghan nurghun kishiler bilen téléfon diplomatiyesi qanat yaydurghanliqini bildürgen fahrettin koja, kishilerning saghlamliqi üchün xizmet qilghan idarilerni her qandaq ehwal astida we sewebi néme bolushidin qetiynezer hujum nishani qilishni qobul qilghili bolmaydighanliqi pikrining, körüshüshlerde muhim nuqta bolghanliqini eskertti.

u: «türkiye bolush süpitimiz bilen, rayongha paraxot doxturxanisi ewetishke, refah chégra éghizigha yéqin jaygha yaki ghezzege dala doxturxanisi qurushqa؛ pelestinlik qérindashlirimizgha bular arqiliq sehiye xizmiti sunup, bu xizmetlerni qanat yaydurushqa teyyarmiz» dédi.

u: «dunya sehiye teshkilatining yawropa rayoni diréktori xans klug bilen körüshkende, bu xizmetlerni qilishqa ruxset qilinghan ehwalda dunya sehiye teshkilati bilen birlikte heriket qilishqa teyyar ikenlikimizni, körüshüshlerde dunya sehiye teshkilatiningmu bu mesilide tarixiy mesuliyitining barliqini qayta-qayta tekitlidim» dédi.

u axirida, her xil diplomatik qiyinchiliqlargha qarimay, türkiyening bowaqlargha, kichik balilargha, yashanghan we bigunah kishilerge yardem qilishni dawamlashturidighanliqini bildürdi.