türkiye seudi erebistanning éléktironluq wiza sistémisi tizimlikige kirgüzüldi
seudi erebistan hej we ömre ishliri ministiri tewfiq errebiye dölitining türkiyeni éléktronluq wiza alalaydighan döletler tizimlikige kirgüzgenlikini bildürdi.
türkiye awazi radiyosi xewiri: türkiye jumhuriyiti qatnash we ul eslihe ministiri abdulqadir uraloghlu seudi erebistan hej we ömre ishliri ministiri tewfiq errebiye we hemrahliqidiki heyet bilen ministirliqta körüshti.
yighinda ikki dölet munasiwitining téximu ilgiri sürülüshi kéreklikini otturigha qoyghan uraloghlu: «wiza béjirish ishlirining qolaylashturulghanliqi üchün rehmet éytimen. bu qedem ömre, hej we bashqa sayahetlerge zor derijide qolayliq yaritip béridu» dédi.
tewfiq errebiyemu türkiyening éléktironluq wiza sistémisigha kirgüzülgenlikini bayan qilip: «türkiye puqraliri éléktironluq wiza sistémisi arqiliq besh minutqa yetmigen waqit ichide yaki seudi erebistanning her qandaq ayrodurumigha barghanda wiza alalaydu. bir yil küchke ige bolidighan wiza bilen 90 kün turalaydu. türkiye puqraliri éléktironluq wiza bilen mekke, medine hemde bashqa barliq rayon we sheherlerni ziyaret qilalaydu» dédi.
ministir tewfiq errebiye seudi erebistan awiyatsiye shirkitining orunduq sighimini ashurghanliqini, enqeredin medine we jiddege uchidighan ayropilanlarning köpiyidighanliqini bildürdi.
méhman ministir hem éléktironluq wiza hem uchush qétim sanining köpiyishining ikki dölet munasiwitini yaxshilaydighanliqi hemde uning sayahet we bashqa sahelerge ijabiy tesir körsitidighanliqini otturigha qoydi.
u ministir uraloghlu bilen birlikte türkiyening yerlik mashinisi — togni heydep sinap baqqanliqini tilgha élip, türkiyeni tebriklidi we uni qisqa waqit ichide seudi erebistanda körüshni xalaydighanliqini sözlirige ilawe qildi.
