türkiye israiliyening pelestinliklerni köchüshke zorlishigha naraziliq bildürdi

türkiye awazi radiyosi xewiri: türkiye jumhuriyiti tashqi ishlar ministirliqi israiliye armiyesining ghezzening shimalida yashaydighan ahalining rayondin chékinishige munasiwetlik telipi toghrisida yazma bayanat élan qilip: «israiliye armiyesining ghezzening shimalida yashaydighan pelestin ahalisining 24 saet ichide ghezzening jenubigha chékinishi kérekliki toghrisidiki uqturushi hergizmu qobul qilinmaydu» dédi.

bayanatta: «uda bir qanche kündin buyan qara - qoyuq bombardiman qiliniwatqan, kolléktip halette tok, su we yémek  - ichmektin mehrum qilinghan ghezzediki 2 milyon 500 ming ademning intayin cheklik rayongha köchüshke mejburlinishi, xelqara qanungha ochuq - ashkara xilapliq bolup, uning insanliqtimu orni yoq» dégen ibarilerge orun bérildi.

bayanatta, israiliyening «bu éghir xataliqni derhal tüzitishi»,  ghezzediki puqralargha qaritilghan «rehimsiz we omumyüzlük heriketlirige derhal xatime bérishi»ning kütülüwatqanliqi tekitlendi.

israiliye armiyesi qamal astidiki ghezzening shimalida yashaydighan pelestinliklerning rayonning jenubigha köchüshini telep qilghanidi.

undin bashqa, israiliye armiyesi izzuddin qessam birigadasi ezalirining ghezzediki tonéllar we öylerning asti, shundaqla puqralar olturaqlashqan binalargha yoshurunuwalghanliqini ilgiri sürgenidi.

pelestin islamiy qarshiliq körsitish herikiti – hamasning herbiy qaniti bolghan «qessam birigadisi» shenbe küni israiliyege qarshi «eqsa topani» namliq keng kölemlik hujum qozghighanliqini élan qilip, ghezzedin israiliyege qaritip minglarche rakétamiyot atqan we qoralliq guruppilar rayondiki ahaliler rayonlirigha basturup kirgenidi.

arqidin israiliye armiyesi urush ayropilanliri bilen ghezzege qarshi «tömür qilichlar» herikitini qozghighanliqini élan qilghanidi.

künséri keskinlishiwatqan toqunush jeryanida ikki tereptin yüzlerche kishi talapetke uchridi.