türkiye parlaménti israiliye bilen pelestinni tinchliq söhbiti ötküzüshke chaqirdi

türkiye awazi radiyosi xewiri: israiliye-hamas toqunushi toghrisidiki birleshme bayanname, türkiye büyük millet mejliside guruppisi bar barliq siyasiy partiyeler teripidin imzalanghandin kéyin, élan qilindi.

bayannamede, ghezze we israiliyediki toqunushlarda ölüp kétiwatqan puqralar sanining köp bolushi, ammiwi muesseselerning hujum nishanigha aylinishi, puqralarni eng eqelliy éhtiyajlirinimu qanduralmaydighan ehwalgha chüshürüp qoyushining  tolimu échinishliq ish ikenliki tekitlendi. shundaqla kirizisning bashqa rayonlarghimu kéngiyip kétish xewpining, rayonning bixeterliki we muqimliqigha chong tehdit shekillendürüwatqanliqi eskertilip mundaq déyildi:

«yéqinqi özgirishler uda 56 yildin buyan dawamlishiwatqan qanunsiz ishghaliyet we bu ishaliyetke munasiwetlik siyasetlerning netijisi hésablinidu. yerliri, turmushi, kelgüsige bolghan arzu – armanliri we ümidliri tartiwélinghan pelestin xelqi bügünki künde misli körülüp baqmighan derijide qorshaw astida qalmaqta. 2 milyon kishi yashawatqan we 16 yilliq qamal arqiliq alliqachan üsti ochuq türmige aylinip qalghan ghezzege bériliwatqan yémeklik, énérgiye we insanperwerlik yardemlirining toxtap qélishi, puqralar  olturaq rayonliriningmu hujum nishanigha aylinishi xelqara qanunning ochuq - ashkara shundaqla éghir derijide depsende qilinishidur.»

bayannamede, pelestin zéminlirida dawamlishiwatqan ishghaliyet heriketlirige derhal xatime bérip, adalet hemde tinchliq ornitishning shert ikenliki tekitlinip mundaq déyildi:

«b d t xewpsizlik kéngishini öz ichige alghan pütkül xelqaraliq jemiyetler derhal mesuliyetni öz üstige élip, kirizisni ikki döletlik hel qilish charisi asasida, toqunushuwatqan tereplerni adalet hemde tinchliq ornitishqa yéteklishi kérek. shuni qayta tekitleymizki, pelestin-israiliye mesilisini adil hel qilghandila, shundaqla 1967-yilqi chégra liniyelirige asasen, paytexti quddus bolghan, musteqil, igilik hoquqluq we jughrapiyelik bir gewdilikke ige pelestin döliti qurulghandila andin ottura sherq rayonida uzun muddetlik adalet hemde tinchliqni ornatqili bolidu.»

bayannamede yene, ghezze we israiliyede toqunushuwatqan tereplerdin toqunushlarni téximu ewj alduruwétishni toxtitishi, w puqralarni hujum nishani qilmasliqi telep qilinip mundaq déyildi:

«ghezzediki pütmes – tügimes insaniy tiragédiyeni téximu éghirlashturuwatqan kolléktip jazalash tedbirliri arqiliq biwasite puqralar nishan qiliniwatqan barliq hujumlarni qattiq eyibleymiz, pelestin bilen israiliyeni téximu köp kéchiktürmestin kirizisni ikki döletlik hel qilish  charesi asasida uzun mezgillik adalet hemde tinchliq ornitish üchün söhbet ötküzüshni bashlashqa chaqirimiz.»