tinchliq buliqi herikiti süriyening zémin pütünlükige töhpe qoshuwatidu

türkiye awazi radiyosi xewiri: türkiye tashqi ishlar ministirliqining bayanatchisi tanju bilgich amérikaning 2019-yildin bashlap süriye dairiside «jiddiy halet» namida chiqarghan pirézidént permani toghrisidiki soalgha yazma jawab berdi.

u «tinchliq buliqi» herikitining p k k|y p g we daésh térrorluq teshkilatlirining térrorluq heriketlirige zerbe bérip, ularni türkiye chégrasidin yiraqlashturghanliqini bildürüp, heriketning süriyening zémin pütünlükini qoghdashqimu töhpe qoshqanliqini qeyt qildi.

u amérika pirézidénti teripidin yéngilanghan permanda asassiz eyibleshlerning témisi bolghan «tinchliq buliqi» herikitining, mahiyette b d t nizamnamesining 51-maddisidiki  özini qoghdash hoquqi we b d t xewpsizlik kéngishining térrorizmgha qarshi küresh qararliri boyiche élip bérilghanliqini, rayonda xatirjemlik we muqimliq muhitini kapaletke ige qilghanliqini tekitlidi.

u: «amérikaning bundaq bir tereplime heriket qilishning ornigha, türkiyening süriyeni muqimliqqa ige qilidighan we bu döletning pütünlükini aldinqi orungha qoyghan siyasetlirini chüshengen halda qollishi, bu ikki ittipaqdashning chongqur yiltiz tartqan we qimmetlik munasiwetlirige téximu mas kélidu. amérikaning bu ramkida bölgünchi térrorluq teshkilati bilen bolghan munasiwetlirini axirlashturushini, 2019-yili 10-ayning 17-küni élan qilinghan birleshme bayanattiki belgilimilerge boysunushini ümid qilimiz» dédi.

aqsaray élan qilghan  bayanatqa qarighanda, amérika pirézidénti jo baydin 2019-yili 10-ayning 14-küni «süriyediki özgirishler we bu dölettin kélidighan amérika dölet bixeterlikige hemde tashqi siyasitige qaritilghan adettin tashqiri pewquladde tehdit» lerge taaqabil turush meqsitide chüshürgen permanining mudditini uzartidighanliqi toghrisida kongrege melumat bergen idi.

pirézidént baydin «bolupmu, türkiye hökümitining süriyening sherqiy shimalida élip bériwatqan herbiy heriketlirining rayonning tinchliqi, muqimliqi we bixeterlikige tehdit salghanliqini, daéshqa qarshi küreshni ajizlashturghanliqi» ni ilgiri sürüp, nöwettiki süriye we uninggha munasiwetlik mewjut weziyetning «amérikaning dölet bixeterlikige we tashqi siyasitige derijidin tashqiri pewquladde tehditler» ni peyda qilishni dawamlashturuwatqanliqini bildürgen idi.

bu sewebtin, baydin 2023-yili 14-öktebir toshidighan jiddiy haletni yene bir yil uzartishni qarar qilghanliqini bildürgen idi.