türkiye süriyening shimalidiki hawadin zerbe bérish heriketliri toghrisida bayanat élan qildi
süriyening shimalida élip bériliwatqan hawadin zerbe bérish heriketliride atalmish bash ishitab, panahlinish orni we ambarlarni öz ichige 15 nishan bitchit qilindi we nurghun térrorchi yoqitip tashlandi.
türkiye awazi radiyosi xewiri: türkiye jumhuriyiti dölet mudapie ministirliqi bayanat élan qilip, p k k / y p g we bashqa térrorluq unsurlirini bir terep qilish arqiliq süriyening shimalidin paydilinip xelq we bixeterlik qisimlirigha qarshi térrorluq hujumi sadir qilish pursetlirini yoqitip, türkiye jumhuriyitining chégra bixeterlikige kapaletlik qilish üchün, birleshken döletler teshkilati (b d t) nizamnamisining 51 – maddisida körsitilgen yolluq qoghdinish hoquqigha asasen, tünügün saet 22 de térrorchilarning süriyening shimalidiki uwrilirigha hawadin zerbe bérilgenlikini uqturdi.
hawadin zerbe bérish herikiti arqiliq ichide mesul derijilik térrorchilarningmu barliqi texmin qiliniwatqan atalmish bash ishitab, panahlinish orni we ambar qatarliqlar bolup, jemiy 15 nishan yer bilen yeksan qilindi.
asasiy jehettin yerlik oq – dorilar ishlitilip élip bérilghan zerbe bérish herikiti jeryanida, nurghun térrorchining bir terep qilinghanliqigha isharet qilinghan bayanatta: «aliyjanab xelqimizning baghridin chiqqan türkiye armiyesi ilgirikige oxshashla bügünmu dölitimiz we xelqimizning mewjutluqi we bixeterlikini qoghdash üchün, térrorluqqa qarshi turush kürishini eng axirqi térrorchi bir terep qilinip bolghuche dawamlashturidu. bu heriket jeryanida, bigunah puqralar, dost küchler, tarixiy, medeniyet bayliqliri we muhitqa ziyan yétip qélishning aldini élishqa munasiwetlik her türlük tedbirler yolgha qoyuldi» dégen ibarilerge orun bérildi.
tunjelining pülümür nahiyeside élip bérilghan zerbe bérish herikitide bolsa, térrorchilar teripidin ishlitilgenliki éniqlanghan ikki panahlinish orni weyran qilindi.
panahlinish ornidiki nurghun teshkiliy höjjet, téxnika we turmush matériyalliri qolgha chüshürüldi.
