türkiye yawropa parlaméntini eyiblidi

türkiye awazi radiyosi xewiri: türkiye tashqi ishlar ministirliqi yawropa parlaménti maqullighan «ezerbeyjanning hujumidin kéyinki taghlaq qarabaghning weziyiti we ezerbeyjanning erméniyege qarita dawamlishiwatqan tehditliri» témiliq qarar heqqide yazma bayanat élan qildi.

ministirliqning bayanatida, mundaq déyildi: «qanuniy jehettin héchqandaq küchke ige bolmighan bu qarar mesuliyetsizlik, bir tereplime qarashning mehsulidur, shundaqla nadanliqning simwolidur.»

«uzun yillardin buyan türkiyege qarshi asassiz eyibleshler we dewalar bilen tolup tashqan qararlarni chiqirish bilen helek boluwatqan ayrimichi yawropa parlaménti ezasining dölitimizge qarshi sözlirige asaslanghan bu qararni qattiq eyibleymiz.»

«yawropa siyasitide awamchiliq, irqchiliq, islam düshmenliki, köp menbelik medeniyet hem bir gewdilishishke qarshi turush xahishliri barghanséri ewj élip kétiwatidu. yawropa bu siyaset arqiliq özining tengsungsiz heriket qiliwatqanliqini ashkarilap qoyuwatidu. wezipe ötesh mudditi yéqinda toshidighan yawropa parlaméntining yawropa ittipaqining qimmet qarashlirigha asaslinidighan, ijabiy, keng dairilik qararlarni chiqiralaydighan we yiraqni körerlik bilen ish qilalaydighan bir qurulmigha ige bolushigha tilekdashmiz.»

«türkiye jenubiy kawkaz rayonida uzaq mezgillik tinchliq, muqimliq we güllinish üchün nahayiti zor tirishchanliqlarni körsetmekte. türkiye erméniye bilen normallashturush musapisini keng qanat yaydurup, erméniye bilen ezerbeyjanning tinchliq musapisige konkrét töhpilerni qoshmaqta, hemde ukraina urushini öz ichige alghan toqunush we insaniy krizisining barliq saheliride xelqara qanungha asasen tinchliq, qérindashliq we ortaq menpeet yetküzüsh pirinsipi boyiche heriket qilmaqta. dölitimiz jumhur reisimiz rejep tayyip erdoghanning rehberlikide muhim we hemme terepke hemnepes bolalaydighan küchlük bir aktiyorgha aylanmaqta.»

«héchkim oylashmaydighan, emma nezer dairisi tar küchlerning diqqitini tartidighan bundaq mesuliyetsiz tékistler yawropa parlaméntining qararigha aylinip, aldimizgha qoyulmaqta. biz buni sistéma xaraktérlik ajizliq dep qaraymiz. derweqe, bu qararning bizge nisbeten qilche ehmiyitimu yoqtur.»