yerlikaya türkiyening yéqinda yolgha qoyulidighan tertipsiz köchmenler siyasiti heqqide melumat berdi
türkiye jumhuriyiti ichki ishlar ministiri eli yerlikaya 1- iyundin 22- séntebirgiche bolghan jeryanda 42 ming 875 qanunsiz köchmenning chégradin qoghlap chiqirilghanliqini bildürdi.
türkiye awazi radiyosi xewiri: türkiye jumhuriyiti ichki ishlar ministiri eli yerlikaya paytext enqerede muxbirlarning soallirigha jawab berdi.
u özi wezipe öteshke bashlighan iyun éyining béshidin tartip 22 – séntebirgiche bolghan jeryanda, 97 ming 363 qanunsiz köchmenning qolgha chüshürülgenlikini we ularning 42 ming 875 ning chégradin qoghlap chiqirilghanliqini tekitlidi.
tertipsiz köchmenlerning asasliqi afghanistan, pakistan, özbékistan we iran chégrasidin kelgenlikige isharet qilghan ministir yerlikaya, özlirining köchme köchmen tekshürüsh tüzümini istanbulda yolgha qoyup, muweppeqiyet qazanghanliqlirini bayan qilip: «1 – öktebirde bursa, adana, izmir we enqerede köchme köchmen tekshürüsh tüzümini yolgha qoyimiz. 1 – noyabirda bu mashinilarning sanini 153 ke yetküzüp, 30 chong sheherlik hökümet tewelikide birla waqitta yolgha qoyimiz, 1 – dékabirda türkiye miqyasida yolgha qoyulidu» dégenlerni qeyt qildi.
girétsiye köchmenler we panahlinish ishliri ministiri we bulghariye ichki ishlar ministiri bilen ötken hepte chégra bixeterliki we qanunsiz köchmenlerge qarshi turush mesilisi toghrisida téléfonda söhbetleshkenlikini bildürgen ministir yerlikaya, bulghariye ichki ishlar ministiri kalin stoyanofning 10- öktebir türkiyege kélidighanliqini, girétsiye köchmenler we panahlinish ishliri ministiri dimitris kéridisning ziyaret waqtining téxi békitilmigenlikini éytti.
