türkiye gollandiyediki quran kerimge qilinghan hujumlarni qattiq eyiblidi
türkiye jumhuriyiti tashqi ishlar ministirliqi gollandiyening lahey shehiridiki türkiye, pakistan, hindonéziye we daniye qatarliq döletlerning elchixaniliri aldidiki quran kerimge qilinghan hujumlar heqqide bayanat élan qildi.
türkiye awazi radiyosi xewiri: türkiye jumhuriyiti tashqi ishlar ministirliqining gollandiyening lahey shehiridiki türkiye, pakistan, hindonéziye we daniye qatarliq döletlerning elchixanilirining aldidiki quran kerimge qilinghan hujumlar heqqide élan qilghan bayanatida: «biz bügün (23-séntebir) gollandiyening lahey shehiridiki bizning elchixanimiznimu öz ichige alghan islam hemkarliq teshkilatigha eza bezi döletlerning elchixaniliri aldida muqeddes kitabimiz <quran kerim>ge qilinghan qebih hujumlarni eng küchlük shekilde eyibleymiz» dégen ibarilerge orun bérildi.
«biz yawropa döletliri köz yumghanséri dinimiz we uning étiqadchilirini haqaretleshni meqset qilghan bu ighwagerchilik hujumlirining barghanséri ulghiyip kétishini we bu öchmenlik qilmishlirigha pikir erkinliki nami astida ruxset qilinishini eyibleymiz» déyilgen bayanatta yene: «mezkur hujumlar sadir qilinghan döletler b d t teripidinmu diniy öchmenlik we xelqara qanungha xilapliq qilish dep qobul qilinghan bu ighwagerchiliklerge qarshi derhal ünümlük tedbirlerni yolgha qoyushi kérek. biz bu hujumlar arqa körünüshide alaqe ornatqan gollandiye dairilirini bu weqeni sadir qilghuchigha qarita zörür tedbir qollinishqa we aldini élish tedbirlirini qollinip, bu qebih qilmishlarning qayta yüz bérishining aldini élishqa chaqirimiz» dégen ibarilerge orun bérildi.
bayanatta yene: «türkiye barliq supilarda bu késel we öchmenlikni asas qilghan rohiy haletke qarshi küreshni qetiy dawamlashturidu» déyildi.
gollandiyediki irqchi we ashqun ongchil gherbning islamlishishigha qarshi wetenperwer yawropaliqlar herikitining rehbiri édwin wagénswéld türkiyening laheydki elchixanisi aldida namayish qilip, yene quran kerimni yirtiwetkenidi.
tünügün türkiye, pakistan, hindonéziye we daniye qatarliq döletlerning laheydiki elchixaniliri aldida quran kerimni yirtip tashlighan wagénswéld, islam we musulmanlarni haqaretligenidi.
türklerni we türkiyenimu haqaretligen wagénswéld, quran kerimni yirtish jeryanida özini qoghdighan saqchilargha rehmet éytqanidi.
