erdoghan nyu yorkta diplomatik uchrishishlirini dawamlashturmaqta
dölitimiz (türkiye jumhuriyiti) jumhur reisi rejep tayyip erdoghan amérika qoshma ishtatlirining nyu york shehiridiki türk öyide diplomatik uchrishishlirini dawamlashturmaqta.
türkiye awazi radiyosi xewiri: birleshken döletler teshkilatining 78 – nöwetlik omumiy kéngesh yighinigha qatnishish üchün amérika qoshma ishtatlirining nyu york shehiride ziyarette boluwatqan jumhur reis rejep tayyip erdoghan shimaliy atlantik ehdi teshkilati bash katipi jéns stolténbérgni qobul qildi.
jumhur reis erdoghan qobuldin kéyin ammiwi ortaqlishish tor bétidiki sehipiside élan qilghan bayanatida, mundaq dédi: «shimaliy atlantik ehdi teshkilati bash katipi stolténbérg bilen birleshken döletler teshkilatining 78 – nöwetlik omumiy kéngesh yighini dairiside bir yerge jem bolduq. uchrishishta küntertipimizdiki rayonluq we xelqaraliq mesililer heqqide muzakire élip barduq. dawamliq shimaliy atlantik ehdi teshkilatining wezipisini her daimqigha oxshash eng aktip shekilde qollashni üzlüksiz dawamlashturimiz.»
erdoghan polsha pirézidénti andréjéj duda bilenmu körüshti.
jumhur reis rejep tayyip erdoghan ammiwi ortaqlishish tor bétidiki sehipiside duda bilen élip barghan körüshüshi toghrisida élan qilghan bayanatida, mundaq dédi: «türk öyide polsha pirézidénti andréjéj duda bilen bolghan uchrishishimizda, rayon mesililiri, ikki tereplik munasiwetlirimiz heqqide muzakire élip barduq. duda ependim bilen körüshüshimizning döletlirimiz we rayonimiz üchün xeyrlik bolushigha tilekdashmen.»
erdoghan aljiriye pirézidénti abdulmejid tebbun bilenmu bir yerge jem boldi.
türkiye jumhuriyiti jumhur reislik mehkimisi uchur – alaqe ishliri idarisining bildürüshiche, jumhur reis erdoghan bilen aljiriye pirézidénti abdulmejid tebbunning uchrishishida, ikki döletning siyasiy we iqtisadiy munasiwetliri, birleshken döletler teshkilatining küntertipidiki mesililer, rayonluq we xelqaraliq özgirishler heqqide muzakire élip bérilghan. shundaqla afriqadiki jiddiychilik, türkiye bilen aljiriyening bu heqtiki hel qilish teklipliri toghriliq özara pikir almashturulghan.
jumhur reis rejep tayyip erdoghan ammiwi ortaqlishish tor béti X sehipiside, bu heqte élan qilghan bayanatida, mundaq dédi: «dost we qérindash dölet aljiriye pirézidénti abdulmejid tebbun bilen nyu york shehiridiki türk öyide bir yerge jem bolduq. türkiye – aljiriye hemkarliq munasiwetlirining tarixi nahayiti uzungha sozulidighan bolup, buni her jehettin tereqqiy qildurushni dawamlashturimiz.»
