putin erdoghangha «erdoghan» namliq höjjetlik filimni teqdim qildi

türkiye awazi radiyosi xewiri: kirémil sariyi bayanatchisi dimitriy péskow rusiye xewer agéntliqi «TASS» qa bergen bayanatida, pirézidént putinning rusiyening sochi shehiride jumhur reis erdoghangha «erdoghan» namliq höjjetlik filimni teqdim qilghanliqini bildürdi.

jumhur reis rejep tayyip erdoghan tonushturulghan höjjetlik filim rusiyelik zhurnalist we rusiye xewer agéntliqi «TASS» ning muawin bash diréktori mixayil gusman  teripidin TASS we Rossiya-24 téléwiziye qanilining hemkarliqida ishlengen.

ilgiri erdoghan bilen töt qétim söhbet ötküzgen gusman teripidin uning ilgiriki erdoghan bilen ötküzgen söhbet bölekliri bilen birlikte «formula wlasti (hakimiyet formulasi)» namliq pirogrammisi dairiside teyyarlanghan höjjetlik filimde, erdoghanning baliliq dewridin buyanqi hayati, siyaset saheside qed kötürüshi, qolgha keltürgen muweppeqiyetliri we hakimiyet yürgüzgen mezgillerdiki xizmetliri tonushturulidu. shundaqla jumhur reis erdoghanning yéqinda türkiye jumhuriyiti jumhur reislik mehkimisi uchur – alaqe ishliri idarisining riyasetchilikide ruschigha terjime qilinghan «téximu adil bir dunya berpa qilish mumkin» namliq kitabidinmu muhim bayanlar neqil keltürülüp, erdoghanning köz qarishi otturigha qoyulidu.

rusiye dölet téléwiziye qanili « Rossiya-24» te tarqitilghan bu höjjetlik filim 6-ayda türkiyening moskwa elchixanisida qoyulghanidi.

rusiyelik zhurnalist gusman jumhur reis rejep tayyip erdoghanning katta siyasiyon ikenlikini tekitlep mundaq  dégenidi:

«türkiye mushundaq bir rehberge ige bolghanliqi üchün nahayiti bextlik dölet. erdoghan katta siyasiyonla emes, talantliq erbab, mislisiz jasaretlik zat. u zamaniwi dunyani chüshinidighan intayin yuqiri melumatliq, istratégiyelik tepekkur qilish iqtidarigha ige siyasiy analizchi. bügünki künde yégane rehber erdoghanning mislisiz roli peqet türkiye üchünla emes, pütkül dunya üchünmu nahayiti zor ehmiyetke ige.»