erdoghan: türkiye rusiyening qirimni bésiwélishini qobul qilghini yoq
dölitimiz (türkiye jumhuriyiti) jumhur reisi rejep tayyip erdoghan türkiyening rusiyening qirimni bésiwélishini tunji kündin bashlapla qobul qilmay, buning qanunsiz ikenlikini ilgiri sürüp kéliwatqanliqini bildürdi.
türkiye awazi radiyosi xewiri: jumhur reis rejep tayyip erdoghan ukrainaning paytexti kiyéwda ötküzülgen 3 – nöwetlik qirim munbiri bashliqlar yighinigha yollighan sinliq bayanatida, ukrainaning bayraq küni we musteqilliq künini tebriklidi, hemde qirim dawasini tinch yollar bilen téximu ünümlük qollash üchün qurulghan bu munberning qirim mesiliside bermekchi bolghan signallargha muhim töhpilerni qoshidighanliqini tekitlep mundaq dédi: «türkiye rusiyening qirimni bésiwélishini tunji kündin bashlapla qobul qilmastin, buning qanunsiz ikenlikini izchil türde ilgiri sürüp kelmekte. biz yene ukrainaning zémin pütünlüki we igilik hoquqini qoghdash meydanimizni izchil saqlap kéliwatimiz. birleshken döletler teshkilatini öz ichige alghan herbir xelqaraliq sehnide qirimning ukrainaning menggü ayrilmas bir parchisi ikenlikini otturigha qoyup kéliwatimiz. qirimning yerlik xelqliridin bolghan qirim tatar türk qérindashlirimizning bixeterliki we bext-saaditige kapaletlik qilish bizning eng muhim wezipilirimizdin biridur.»
erdoghan tutqundiki qirim tatarliri milliy mejlisining muawin reisi neriman jelal we uning dostlirining qoyup bérilishini chin dilidin ümid qilidighanliqlirini eskertip mundaq dédi: «hemishe tekitlep kéliwatqinimdek, urushning ghelibe qilghuchisi bolmighinidek, tinchliqningmu meghlubiyetchisi bolmaydu. mana mushu angni chöridigen halda ikki yilgha yéqin waqittin buyan üzlüksiz dawamlishiwatqan rusiye – ukraina urushining adil we uzaq mezgillik tinchliq asasida axirlishishi kéreklikige bolghan ishenchimizni saqlap kéliwatimiz. bu jeryanda barliq alaqe wasitiliridin paydilinip éqiwatqan qanning toxtishi, héchbolmighanda tereplerni söhbet ötküzüshke qayil qilish üchün nahayiti zor tirishchanliq körsitiwatimiz.»
jumhur reis erdoghan qaradéngiz ashliq karidori kélishimini eslige keltürüsh üchün dawamliq xizmet ishlewatqanliqlirini, bu basquchta jiddiychilikni téximu ewj alduruwétidighan we qaradéngiz rayonining tinchliqigha ziyan yetküzidighan herqandaq herikettin saqlinish kéreklikini bayan qildi.
