ministir fidan iraq kord rayonluq hökümitining rehbiri bilen körüshti
dölitimiz (türkiye jumhuriyiti) tashqi ishlar ministiri xaqan fidan iraqtiki uchrishishlirining axirqi küni iraq kord rayonluq hökümitining bashliqi nechirwan barzani we iraq kord rayonluq hökümiti bash ministiri mesrur barzani bilen körüshti.
türkiye awazi radiyosi xewiri: tashqi ishlar ministiri xaqan fidan üch künlük iraq ziyaritining axirqi küni erbilde uchrishishlarda bolmaqta.
ministir fidan erbilde aldi bilen iraq kord rayonluq hökümitining bashliqi nechirwan barzani bilen, andin kord rayonluq hökümiti bash ministiri mesrur barzani körüshti.
fidan uchrishishtin kéyin ötküzülgen qoshma axbarat élan qilish yighinida qilghan sözide, térrorizmgha qarshi küreshte hemkarliq ornitishning nahayiti zor ehmiyetke ige ikenlikini tekitlep mundaq dédi: «térrorizm apitidin qutulush üchün ishleshke tégishlik nurghun xizmetlirimiz bar. silergimu (axbarat wasitilirighimu) ayan bolghinidek, biz bu mesilini türkiyede asasiy jehettin hel qilduq. hazir iraq térrotériyeside bölgünchi térrorluq teshkilati p k k özini yoshuruwatidu. xudayim buyrusa, bu wirusni iraqtin birlikte tazilaymiz.»
iraq kord rayonluq hökümiti bash ministiri mesrur barzani mundaq dédi: «men rayondiki her xil térrorluqqa (p k k gha) qarshi küresh qilish üchün (türkiye bilen) hemkarliqimizning dawam qilishini ümid qilimen.»
tashqi ishlar ministiri fidan k d p (kord démokratlar partiyesi) rehbiri mesud barzani bilen bir yerge jem bolidu.
axbarat wasitilirigha yépiq halette ishqa ashuruluwatqan uchrishishlarda ikki terep munasiwetlirini tereqqiy qildurush, hemkarliqni ilgiri sürüsh, iqtisadiy hemkarliqni kücheytish we térrorizmgha qarshi ortaq küresh qilish qatarliq mesililer muzakire qilinmaqta.
ministir fidan 22-awghusttin 24-awghustqiche bolghan iraq ziyaritining birinchi küni paytext baghdatta iraq tashqi ishlar ministiri fuad hüseyin bilen körüshkenidi.
fidan tünügünmu iraq iprézidénti abdullatif réshit, iraq bash ministiri muhemmed shiya essudani, iraq parlaméntining bashliqi muhemmed xalbusi, malayshiya tashqi ishlar ministiri zambri abdulqadir, iraq türkmen fironti (ITC) ning reherliri, iraq türkmenlirining jamaet erbabliri, iraq igilik hoquq ittipaqining rehbiri hamis xencher, fetih ittipaqining rehbiri hadi amiri, milliy hékmet éqimi rehbiri emmar elhékim, iraqning sabiq bash ministiri, qanun döliti birleshmisining rehbiri nuri elmaliki we heshdi shebi komitétining reisi falih elfeyyad qatarliqlar bilenmu bir yerge jem bolghanidi.
