erdoghan budapéshtta bir qatar döletlerning rehberliri bilen körüshti

türkiye awazi radiyosi xewiri: jumhur reis rejep tayyip erdoghan wiktor orbanning teklipi bilen yétip barghan paytext budapéshttiki karmélita monastirida ötküzülgen körüshüshte, türkiye-wéngiriye munasiwetliridin bashqa, türkiyening yawropa ittipaqigha eza bolush musapisi we dunya küntertipi mesililirini muzakire qildi.

rejep tayyip erdoghan ziyariti ramkisida, budapéshtta özbékistan pirézidénti shewket mirziyayéw we uning hemrahliqidiki heyet bilen körüshti.

körüshüshlerde, türkiye bilen özbékistan munasiwetliridin bashqa, rayon we dunya mesililiri muzakire qilindi.

rejep tayyip erdoghan budapéshtta sérbiye pirézidénti aléksandar wujij bilenmu körüshti.

körüshüshte, türkiye-sérbiye munasiwetliri we rayon mesililiri muzakire qilindi.

jumhur reis rejep tayyip erdoghan balqanlarning tinchliq we muqimliq nuqtisidin sérbiyeni halqiliq dölet süpitide köridighanliqlirini eskertip, türkiye-sérbiye munasiwetlirining tarixidiki eng yuqiri sewiyege yetkenlikini bildürdi.

u budapéshtta bashlanghan 2023-yilliq dunya yénik atlitka musabqisining erler 100 métirgha yügresh hel qilghuch musabiqisini kördi. u sehnide ezerbeyjan pirézidénti ilham eliyéw we qatar emiri sheyx temim bin haméd alsani bilen söhbetleshti.

u wéngiriye pirézidénti katalin nowak bilen körüshkende, wéngiriyening dölet bayrimini tebriklidi.

körüshüshte, ikki dölet munasiwetliri, rayonluq we xelqaraliq mesililer muzakire qilindi.

u bosniye-gértségowina pirézidéntliq kéngishining ezasi zelika jwizhyanowij we sérbiye pirézidénti milorad dodik bilenmu körüshti.

bosniye-gértségowina pirézidéntliq kéngishining ezasi zelika jwizhyanowij bilen bolghan körüshüshte, ikki terep munasiwetliri, hazirqi hemkarliqlarni téximu chongqurlashturush üchün tashlash mumkin bolghan qedemler muzakire qilindi.

rejep tayyip erdoghan budapéshttiki uchrishishlirini axirlashturghandin kéyin, türkiyege qaytti.

u wéngiriye ziyariti toghrisida ijtimaiy taratqu adrésida hembehrligen uchurida: «bügün istratégiyelik shérikimiz hemde natodiki ittipaqdishimiz wéngiriyening qurulush yili we dunya yénik atlitka musabiqilirining bashlinish munasiwiti bilen budapéshtta bolduq. ziyaretlirimizde, wéngiriye pirézidénti we bash ministirigha méhman bolghan bashqa döletlerning bashliqliri bilenmu bir yerge jem bolduq» dédi.

u wéngiriye bilen chongqur we saghlam dostluq rishtilirigha tayanghan keng dairilik munasiwetlerge ige ikenliklirini tekitlep, mundaq dédi:

«munasiwetlirimizning her saheside muhim ilgirileshlerni qolgha keltürüwatimiz. ikki döletning soda omumiy sommisi 2022-yili 3.5 milyard dollar sewiyesige yétip, tarixtiki eng yuqiri sewiyege yetti. birlikte tirishish arqiliq bu reqemni qisqa waqit ichide 6 milyard dollargha yetküzidighanliqimizgha ishinimiz. munasiwetlirimizni barliq terepliri bilen közdin kechürüsh we munasiwetlirimizni téximu ilgiri sürüsh meqsitide tashlaydighan qedemler muzakire qilinghan ziyaritimizning xeyrilik bolushini tileymen» dédi.