түркийә билән әрәб бирләшмә хәлипилики 50 милйард 700 милйон долларлиқ келишим имзалиди

түркийә авази радийоси хәвири: җумһур рәис рәҗәп таййип әрдоған түнүгүн парс қолтуқи дөләтлири зийаритиниң ахирқи бекити болған әрәб бирләшмә хәлипиликидә хәлипилик рәиси шәйх муһәммәд бин зайид ал нәһйан тәрипидин рәсмий мурасим билән қарши елинди.

әлвәтән сарийида өткүзүлгән мурасимдин кейин, әрдоған билән ал нәһйан айрим көрүшти, андин һәйәтләр ара сөһбәткә иштирак қилди.

әрдоған йиғинда қилған сөзидә, икки дөләт оттурисида имзалинидиған ортақ келишим билән мунасивәтләрниң истратегийәлик шериклик дәриҗисигә йетидиғанлиқини тилға елип: «биз йуқири дәриҗилик истратегийәлик кеңәш механизми арқилиқ мунасивитимизниң әң йуқири сәвийәдә қәрәллик музакирә қилинишиға капаләтлик қилимиз» деди.

әрдоған 7-айниң 25- күнидин 28- күнигичә истанбулда өткүзүлидиған хәлқара мудапиә санаити йәрмәнкиси билән бу һәмкарлиқниң илгири сүрүлидиғанлиқини тәкитләп, әбузәби хәлқара китаб йәрмәнкисигә «әзиз меһман» сүпитидә тәклип қилинғанлиқидин сөйүнгәнликини ипадилиди.

у бу йил ичидә әбузәбидә түркийә мәдәнийәт мәркизини ечиш арқилиқ бу һәмкарлиқни йүксәк пәллигә көтүрүшни халайдиғанлиқлирини билдүрди.

икки рәһбәрниң сөзидин кейин, түркийә билән әрәб бирләшмә хәлипилики оттурисида мәбләғ селиш, иқтисад, санаәт, мудапиә, қанун, әдлийә, қайта һасил болидиған енергийә вә аләм бошлуқи санаити қатарлиқ саһәләрдә омумий соммиси 50 милйард 700 милйон долларға йетидиған 13 түрлүк келишим имзаланди.

ал нәһйан сөһбәтләрдин кейин, җумһур рәис әрдоғанға «зайд дөләт медали» тәқдим қилди.

әрдоған билән ал нәһйан бу йил әрәб бирләшмә хәлипиликидә өткүзүлидиған бирләшкән дөләтләр тәшкилати килимат өзгириши йиғини үчүн алаһидә тәййарланған биләйзүкни тақап сүрәткә чүшти.

ал нәһйан җумһур рәис әрдоғанни башлиқлар йиғиниға тәклип қилди.

уму ал нәһйанға түркийәниң тунҗи йәрлик машиниси тоггни совға қилди.

ал нәһйан әлвәтән сарийидин «памуққәлә еқи» рәңгидики тоггни һәйдәп әрдоған билән бирликтә әбузәби кочилирини айланди.

андин, ал нәһйан җумһур рәис әрдоғанни у туруватқан меһманханиға тогг билән әкелип қойди.