döletning yuqiri derijilik rehberliri 15 - iyul munasiwiti bilen télégramma tarqatti

türkiye awazi radiyosi xewiri: dölitimiz tashqi ishlar ministiri xaqan fidan ijtimaiy taratqudiki adrésida 15 – iyul démokratiye we milliy ittipaqliq küni munasiwiti bilen télégramma tarqitip: «ulugh millitimiz 15 - iyul xelqara jahangirlikining wakaletchiliri arqiliq türkiyeni qolgha chüshürüsh urunushlirini jumhur reisimizning rehberlikide meghlup qilip, türkiye esirining derwazilirini achti. qehrimanlarche meydanlargha chüshüp, fethullahchi térrorluq teshkilatidin ibaret xiyanet shaykisining ilgirilishige yol qoymighan eziz shéhitlirimizni hörmet bilen xatirileymen, qehriman ghazilirimizgha minnetdarliqimni bildürimen. démokratiye we milliy ittipaqliq künige mubarek bolsun!» dégenlerni qeyt qildi.

dölet mudapie ministiri yashar gülermu özining ijtimaiy taratqudiki adrésida télégramma tarqitip: «wetini, bayriqi we muqeddes qimmetlirini qoghdash yolida 15 – iyul kéchisi xainlargha qarshi kökrek kérip meydanlargha chüshüp, janlirini pida qilghan eziz shéhitlirimizni hörmet bilen esleymen؛ bu yolda ghazi bolghan qehrimanlirigha we 15 – iyul dastanini yazghan eziz xelqimizge hörmet we minnetdarliqimni bildürimen» dédi.

ichki ishlar ministiri eli yerlikaya bolsa, 15 - iyul démokratiye we milliy ittipaqliq künining 7 yilliqi munasiwiti bilen ijtimaiy alaqe torida uchur hembehrilep töwendiklerni qeyt qildi: «15 - iyulning 7 – xatire yilida, dölitimizning her qaysi bulung - puchqaqlirida türkiye esirining qehrimanliri bolghan shéhitlirimizni, ghazilirimizni we qolliridiki ay – yultuzluq shanliq bayriqimiz bilen xainlarning yolini torighan milyonlarche weten ewladini eng küchlük shekilde xatirileymiz.

jumhur reisimiz rejep tayyip erdoghanning sözlirini jarangliq halda qayta tekrarlaymiz: <siler muweppeqiyet qazinalmaysiler! millitimizni bölelmeysiler! bayriqimizni chüshürelmeysiler! wetinimizni parchiliyalmaysiler! dölitimizni weyran qilalmaysiler! ezanlirimizni jimiqturalmaysiler! bu döletni tiz püktürelmeysiler! bu xelqke boyunturuq salalmaysiler! bizni ming yildin buyan méngiwatqan bu yoldin tosup qalalmaysiler! dölitimizni nishanidin waz kechtürelmeysiler!>»