türkiye xewpsizlik kéngishige naraziliq bildürdi

türkiye awazi radiyosi xewiri: türkiye tashqi ishlar ministirliqi yazma bayanat élan qilip, shimaliy qibris türk jumhuriyitining b d t xewpsizlik kéngishining qibris toghrisida achqan axbarat élan qilish yighinigha tutqan pozitsiyesini pütünley qollaydighanliqini bildürdi.

b d t xewpsizlik kéngishining meghlub bolghan we réalliqqa uyghun bolmighan hel qilish endiziside dawamliq ching turuwatqanliqi eskertilgen bayanatta,

fédératsiyelik hel qilish nishanining qibris türk xelqining igilik hoquqi iradisini eks ettürmeydighanliqidek heqiqetni, her qaysi terepler tepsiliy oylishishi kérek» déyildi.

bayanatta, xewpsizlik kéngishining b d t bash katipining doklatini asas qilishtin tedrijiy yiraqlishiwatqan pozitsiyesining, qibrista hel qilish charisini ilgiri sürüshning ornigha qibris rum hakimiyiti teripidin aralning qedimkiy we asasliq igiliri bolghan qibris türklirini yoq hésablighan muressesiz pozitsiyesini kücheytiwetkenliki tekitlendi.

bayanatta mundaq déyildi:

«biz xewpsizlik kéngishining qibris türklirining ilgiri muzakire qilinghan hel qilish endizisini qollashtin waz kechkenlikini chüshinishini ümid qilimiz. qibrista emelge ashidighan adil, uzun muddetlik we imkaniyetlik sijil hel qilish charisining, bu araldiki ikki xelqning iradisini eks ettürüshi kéreklikini, uni üchinchi terepning mejburiy tangmasliqini yene bir qétim tekitleymiz. biz b d t xewpsizlik kéngishini we xelqaraliq jemiyetni, qibris arilida ikki ayrim xelq we ikki ayrim dölet barliqidek heqiqetni asas qilghan halda qibris türk xelqning tebiiy heq-hoquqi bolghan igilik hoquqi barawerlikini, barawer xelqaraliq salahiyitini étirap qilishqa dewet qilimiz. buning qibris mesilisini hel qilishqa munasiwetlik yéngi muzakire musapisining bashlinishi üchün kem bolsa bolmaydighan aldinqi shert ikenlikini tekitleymiz.»