erdoghan rutté bilen téléfonlashti

türkiye awazi radiyosi xewiri: türkiye jumhuriyiti jumhur reislik mehkimisi uchur – alaqe ishliri idarisi bayanat élan qilip, téléfon söhbiti jeryanida, jumhur reis erdoghanning aldimizdiki yili türkiye – gollandiye dostluq kélishimi tüzgenlikining 100 yilliqining tebriklinidighanliqini, yuqiri derijilik ziyaretler arqiliq ikki terep munasiwetlirining yüksek pellige kötürülidighanliqigha ishinidighanliqini tilgha élip ötkenlikini uqturdi.

bayanatta körsitilishiche, shiwétsiyening shimaliy atlantik ehdi teshkilati — natogha eza bolush musapisimu muzakire qilinghan téléfon söhbiti jeryanida, jumhur reis erdoghan shiwétsiyening térrorluqqa qarshi turush qanunigha özgertish kirgüzüsh arqiliq toghra yönilishke qarap qedem tashlighanliqini, emma bölgünchi térrorluq teshkilati p k k/ p y d/ y p g terepdarlirining erkin – azade halda térrorluqni medhiyeleydighan namayishlarni teshkilleshlirining tashlanghan qedemlerni yoqqa chiqarghanliqini eskertken.

gollandiye bash ministiri ruttégha musulmanlarning muqeddes kitabi «quran kerim» ge qilinghan hujumlarni pikir erkinliki toni astida yolluqlashturushqa bolmaydighanliqini bildürgen jumhur reis erdoghan, sadir qilinghan qilmishlarning ochuq – ashkara pikir jinayiti ikenlikini otturigha qoyghan.

rehberler téléfon söhbiti jeryanida yene 11-, 12- iyul künliri litw paytexti wilnyusta échilidighan nato bashliqlar yighinining eng muhim küntertiplirining birining rusiye- ukraina urushi bolidighanliqi toghrisida birdeklik hasil qilghan.