erdoghan musapirlar mesilisini menbeside turghuzup hel qilishning zörürlükini otturigha qoydi

türkiye awazi radiyosi xewiri: türkiye jumhuriyiti jumhur reisi rejep tayyip erdoghan insanperwerlik we qoshnidarchiliq mejburiyitini izchil ada qilip kéliwatqan türkiyening, panahliq tiligüchilerning wetinige bixeter, ixtiyari we izzet – abroyi qoghdalghan halda qaytishigha kapaletlik qilishni qollaydighanliqini we buning üchün zörür türlerni yolgha qoyghanliqini bildürdi.

dunyaning oxshimighan jaylirida kishilerning térrorluq, toqunush, ichki urush, acharchiliq we qurghaqchiliq qatarliq sewebler tüpeylidin köchüshke mejbur bolup qalghanliqini tekitligen erdoghan télégrammisida: «bizning tertipsiz köchmenlik we musapirlar mesilisidiki meydanimiz, dölitimizning bixeterliki bilen birlikte, insanlarning hayati we izzet- hörmitini qoghdashtur. esirlerdin buyan héchqandaq ayrimchiliq qilmastin, zulumdin — ziyankeshliktin qachqanlarni baghrigha bésip kelgen millitimiz, u wijdaniy pozitsiyeni süriyedin ukrainaghiche bolghan rayonimizdiki krizislar aldida yene bir qétim namayan qildi. türkiye insanperwerlik we qoshnidarchiliq mejburiyitini izchil ada qilip, panahliq tiligüchilerning wetinige bixeter, ixtiyari we izzet – abroyi qoghdalghan halda qaytishigha kapaletlik qilishni qollaydu we buning üchün zörür türlerni yolgha qoyidu» dégen ibarilerge orun berdi.

gherb döletliride yiltiz tartqandin kéyin zeherlik sériq otqa oxshash bashqa jemiyetlergimu tarqalghan musapirlargha öchmenlik qilish xahishini, yéngi natsistlarche idiyeni, musulmanlar bilen chet elliklerge öchmenlik qilishni ret qilidighanliqini tekitligen erdoghan: «biz özining irqi, kulturi we eqidisi sirtidiki barliq kishilerni insan hésablimaydighan bu késel éqimlarni insaniyetning ortaq kelgüsige tehdit dep qaraymiz» dégenlerni qeyt qildi.

tarixtin buyan medeniyetlerning böshüki bolup kelgen aq déngizning yéqinqi yillardin buyan ghayet zor musapirlar qebristanliqigha aylinishida yiltizi mustemlikichilikke tutishidighan tekebbur rohiy haletning nahayiti küchlük tesiri barliqini tilgha alghan erdoghan: «ötken hepte ege déngizida yüz bérip, köpinchisi balilardin terkib tapqan yüzlerche kishining ölümini keltürüp chiqarghan insanliq tiragédiyesi, buning eng yéngi we nomus qilarliq misalini teshkil qildi» dédi.

erdoghan xelqara jemiyetning, bolupmu özidin bashqa hemme ademge kishilik hoquq we démokratiye sawiqi béridighan döletlerning emdi bolsimu mesuliyetni üstige élishi kéreklikini otturigha qoydi.

jumhur reis erdoghan musapirlar mesilisining kishilerning köchüshke, yurt – makanliridin ayrilip qélishini keltürüp chiqarghan amillarni menbeside turghuzup yoqitish arqiliqla hel bolidighanliqini sözlirige ilawe qildi.