rusiyelik zhurnalist: erdoghanning roli türkiyedila emes, dunyadimu intayin muhim
rusiyelik zhurnalist we TASS xewer agéntliqining muawin bash diréktori mixayil gusman dölitimiz (türkiye jumhuriyiti) jumhur reisi rejep tayyip erdoghan heqqide höjjetlik filim ishlidi.
türkiye awazi radiyosi xewiri: rusiyelik zhurnalist gusman TASS xewer agéntliqi we Rossiya-24 téléwiziye qanilining hemkarliqida jumhur reis rejep tayyip erdoghan heqqide ishligen höjjetlik filimini tonushturush murasimida, türkiyening moskwa elchixanisida ötküzdi.
höjjetlik filimni tonushturush murasimigha, rusiye muawin tashqi ishlar ministiri aléksandir grushko, türkiyening moskwada turushluq bash elchisi mehmet samsar, TASS xewer agéntliqining bash dériktori sérgéy mixaylow, chet ellerning diplomatik wekilliri we zhurnalistlar qatnashti.
ilgiri uda töt qétim erdoghan bilen söhbet ötküzgen rusiyelik zhurnalist gusman «hakimiyetning formulasi» pirogrammisi dairiside ishligen höjjetlik filimide, erdoghanning baliliq dewridin buyanqi hayati, siyasette qed kötürüshi, qolgha keltürgen muweppeqiyetliri, hakimiyet béshigha chiqqandin buyan xelqi hem döliti üchün ishligen xizmetliri, zhurnalistning erdoghan bilen ötküzgen aldinqi söhbetliri bilen birlikte eks ettürüldi.
höjjetlik filimde jumhur reis rejep tayyip erdoghanning yéqinda türkiye jumhuriyiti jumhur reislik mehkimisi uchur – alaqe ishliri idarisining rehberlikide ruschigha terjime qilinghan «téximu adil bir dunya tertipi ornitish mumkin» namliq kitabidinmu muhim bayanlargha orun bérilip, erdoghanning köz qarashliri alahide tekitlendi.
gusman höjjetlik filimni tonushturush murasimdin kéyin, söz qilip mundaq dédi: «jumhur reis rejep tayyip erdoghan mislisiz siyasiyondur. türkiye mana mushundaq bir rehberge ige bolghanliqi üchün nahayiti teleylik bir dölet. jümlidin, erdoghan peqet mislisiz bir siyasiyon bolupla qalmastin, yene mislisiz bir shexs, jezbidar rehber. shundaqla intayin yuqiri melumatliq, istiratégiyelik tepekkur qilish iqtidarigha ige siyasiy analizchi. zamaniwi dunyani toluq chüshineleydighan mislisiz talant sahibi. bügünki künde rehber bolush süpiti bilen erdoghanning roli türkiyedila emes, dunyadimu intayin muhim».
bu höjjetlik filimning yéqinqi ikki künde rusiye döletlik téléwiziye qanallirida ikki qétim körsitilgenlikini, milyonlighan kishining bu höjjetlik filimni körgenlikini eskertken gusman mundaq dep körsetti: «erdoghanni rusiyelik körürmenlerge tonushturush tolimu muhim. tolimu epsuski, türkiye we rusiyede kishiler dunya rehberlirini toluq bilmeydu, hetta qoshna döletlerning rehberlirinimu yaxshi bilmeydu. türkiye bizning qoshnimiz, shundaqla uzun yilliq hemrahimizdur. jumhur reis rejep tayyip erdoghanning hakimiyet yürgüzüwatqinigha uzun yillar boldi. shu wejidin, uni toluq tonushturush we uning özige xas alahidiliklirini toluq süretlep bérish intayin muhim.»
gusman eger mumkin bolsa erdoghan bilen 5 – qétim söhbet ötküzüshni chin dilidin arzu qilidighanliqini eskertti, hemde türkiye xelqige bolghan chongqur hörmitini izhar qildi.
