dunya rehberliri erdoghanni tebriklidi

türkiye awazi radiyosi xewiri: türk dunyasi rehberliri erdoghanning jumhur reis saylimining ikkinchi aylanmisidiki ghelibisini tebriklidi. ularning sözliridiki birlik - barawerlik tuyghusi diqqet qozghidi.

shimaliy qibris türk jumhuriyitining reisi ersin tatar jumhur reislik mehkimiside ötküzülgen muxbirlarni kütüwélish yighinidiki sözi jeryanida, erdoghanning ghelibe qilishining shimaliy qibris türk jumhuriyiti we sherqiy aq déngizning muqimliqi üchün intayin muhim ikenlikini otturigha qoyup: «ana weten türkiyede ötküzülgen saylamdin kéyin, hörmetlik erdoghanning ghelibisi we shimaliy qibris türk jumhuriyitidiki ikki döletlik siyasetmu tekitlengen boldi» dédi.

ezerbeyjan pirézidénti ilham eliyéw jumhur reis erdoghangha téléfon qilip, saylamda utuq qazanghanliqini tebriklidi we uning eng qisqa waqit ichide ezerbeyjanni ziyaret qilishini kütidighanliqini éytti.

eliyéw saylam netijisining erdoghanning türkiyening  omumyüzlük tereqqiyatini ishqa ashurushni közlep qetiylik bilen yolgha qoyghan keng dairilik siyasiti we qilghan bibaha xizmetlirige bérilgen eng chong mukapat ikenlikini otturigha qoydi.

özbékistan pirézidénti shewket mirziyayéwmu jumhur reis erdoghangha téléfon qilip tebriklidi we saylam netijisining türkiye xelqi üchün xeyrlik bolushini tilidi.

qazaqistan pirézidénti qasim jomert toqayéwmu özining ijtimaiy supisidiki adrésida tebrik télégrammisi tarqitip: «döletlirimizni tarixiy dostluq we ittipaqliq rishtisi tutashturup turidu. bu keng dairilik hemkarliq istratégiyesi téximu tereqqiy qilidu» dédi.

qirghizistan pirézidénti sadir japaro «qedirlik qérindishim rejep tayyip erdoghan» dégen söz bilen bashlanghan ijtimaiy alaqe supisidiki tebrik télégrammisida: «türkiye ochuq, riqabetchi we démokratik saylam ülgisini namayan qildi» dégen ibarilerge orun berdi.

türkmenistan milliy kéngishi xelq meslihet ishliri orgini reisi gurbanguli berdimuhemmedowmu jumhur reis erdoghangha téléfon qilip tebriklidi we xizmitige utuq tilidi.

türk döletliri teshkilati bash katipi kubanichbék ömuraliyéw jumhur reis saylimida ghelibe qilghan jumhur reis erdoghangha tebrik xéti ewetti؛ u xétide, jumhur reis erdoghangha «türkiye we türk dunyasi yüz yilining ul tashliri qoyulidighan» kelgüside muweppeqiyetlerni tilep, saylam netijisining barliq türkiye xelqi , türkiye we türk dunyasi üchün xeyrlik bolushini tilidi.

rusiye pirézidénti wiladimir putin saylamda ghelibe qilghanliqi munasiwiti bilen jumhur reis erdoghangha yollighan télégrammisida, bu ghelibining erdoghanning türkiye jumhur reisi süpitide jan pidaliq bilen qilghan xizmetlirining tebiiy netijisi ikenlikige isharet qilip: «ghelbingiz türkiye xelqining döletning igilik hoquqini kücheytish we musteqil tashqi siyaset yürgüzüsh yolidiki tirishchanliqingizni qollighanliqining roshen ipadisi» dégenlerni qeyt qildi.

amérika pirézidénti jo baydin twittérdiki adrésida uchur hembehrilep: «men türkiye jumhur reisi rejep tayyip erdoghanning qayta saylanghanliqini tebrikleymen. shimaliy atlantik ehdi teshkilati – nato ittipaqdashliri bolush süpitimiz bilen, ikki dölet mesililiri we dunyawi ortaq xirislar üstide dawamliq hemkarliship xizmet qilishni sewrsizlik bilen kütmektimen» dédi.

xitay dölet reisi shi jinping jumhur reis erdoghanning qayta saylanghanliqini tebriklidi we türkiye bilen xitayning ikki chong dölet bolush süpiti bilen, keng dairilik ortaq menpeetlerke ige ikenlikini bildürdi.

firansiye pirézidénti émmanuél makronmu twittérdiki adrésida türkche uchur hembehrilep, jumhur reis rejep tayyip erdoghanni tebriklidi. u, firansiye bilen türkiyening tinchliqning yawropagha qaytip kélishi, yawro- atlantik okyan ittipaqi we aq déngizning kelgüsi qatarliq birlikte yéngishi kérek bolghan sinaqlarning barliqini eskertip: «biz, men qayta saylanghanliqi munasiwiti bilen tebrikligen jumhur reis erdoghan bilen birlikte algha ilgirileshni dawamlashturimiz» dédi.

gérmaniye pirézidénti frank waltér stéynméyérmu jumhur reis rejep tayyip erdoghanning qayta saylanghanliqini tebriklidi.

gérmaniye bash ministiri olaf sholz tiwittérdiki adrésida bayanat bérip: «gérmaniye bilen türkiye yéqin shérik we ittipaqdash, hemde küchlük ijtimaiy we iqtisadiy munasiwitimiz bar. men jumhur reis erdoghanning qayta saylanghanliqini tebrikleymen. nöwette biz ortaq mesililirimizni yéngi heriketlendürgüch küch bilen ilgiri sürüshni xalaymiz» dégenlerni qeyt qildi.

engliye bash weziri rishi sunak jumhur reis rejep tayyip erdoghanning jumhur reis saylimining ikkinchi aylanmisida utuq qazanghanliqini tebriklidi we ikki döletning küchlük hemkarliqni dawamlashturushni taqetsizlik bilen kütüwatqanliqini éytti.

kanada bash ministiri jastin trudomu ijtimaiy taratqudiki adrésida uchur hembehrilep, jumhur reis erdoghanning qayta saylanghanliqini tebriklidi.

nato bash katipi yéns stolténbérg jumhur reis rejep tayyip erdoghanning qayta saylanghanliqini tebriklep: «hemkarliqni dawamlashturup, 7- aydiki nato bashliqlar yighinigha teyyarliq qilishni töt köz bilen kütmektime» dédi.

yawropa kéngishi reisi charliz mishél we yawropa ittipaqi komitéti reisi won dér léyinmu erdoghanning qayta jumhur reis bolup saylanghanliqini tebriklidi.

birleshken döletler teshkilati (b d t) bash katipi antoniyo gutérrés türkiye jumhuriyiti aliy saylam orginining waqitliq saylam netijilirige asasen qayta saylanghan jumhur reis rejep tayyip erdoghanni tebriklidi.

yene bir tereptin, qatar, shimaliy makédoniye, norwégiye, shiwétsiye, ukraina, pakistan, liwiye, aljiriye, sénégal, pil chishi, sérbiye, türkmenistan, özbékistan, wéngiriye, wénézuéla, iran, pelestin, albaniye, kosowo, iraq, somali, giruziye, liwan, tunis, bélarusiye, sudan, iyordaniye, erméniye, israiliye, bosniye - gértségowina, moldawiye, giwinéye bissaw, biraziliye, bélgiye, kuweyt, ereb birleshme xelipiliki, awstriye, gollandiye, italiye, malta, oman, behreyn, seudi erebistan, yemen, zambiye, argéntina, paragway kuba, boliwiye, ékwador, giwatémala, dominika jumhuriyiti, kolombiye, méksika, péru, salwador, kostarika we qirghizistan rehberlirimu jumhur reis rejep tayyip erdoghanning jumhur reis saylimining ikkinchi aylanmisida % 52.16 awazgha ériship, ghelibe qilghanliqini tebriklidi.