türkiye girétsiyening dewalirini pütünley ret qildi
dölet mudapie ministirliqi türkiyening girétsiyening «pontus» dewalirini pütünley ret qilidighanliqini jakarlidi.
türkiye awazi radiyosi xewiri: türkiye jumhuriyiti dölet mudapie ministirliqi teripidin bu heqte élan qilinghan yazma bayanatta, girétsiyening «pontus» dewalirining pütünley asassiz ikenliki tekitlinip mundaq déyildi: «girétsiye dairilirining <pontus> dewalirini pütünley ret qilimiz. chünki her qandaq seweb we mentiqidin yiraq bolghan bu dewalar tarixiy pakitlarni burmilashtin bashqa nerse emes. girétsiye siyasiyonlirining qilche tarixiy melumat we höjjetlerge saslanmaydighan bu dewalirining hemmisi girétsiye xelqini aldashni meqset qilghan bolup, pütünley yalghandur.»
«türkiye xelqining ötmüshidin kishini xijil qilidighan qandaqtur birer réalliqni izdeydighanlar peqet özliriinila aldaydu, xalas.»
«buningdin texminen 100 yil ilgiriki dewrge ait shirin chüsh körüwatqanlar aldi bilen eynekke qarashliri kérek. bu nuqtidin éytqanda, girétsiye siyasiyonliri özliri tewe bolghan osmanli impériyesige qarshi isyan kötürgen basquchtiki tripolichede we 1919-yildin 1922-yilghiche anadolugha tajawuz qilmaqchi bolghan mezgildiki ejdadlirining qangha boyalghan wehshiyliki bilen yüzlishishi kérek. shundaqla ejdadlirining anadoluda néme ishi barliqi heqqide jawab bérishi lazim.»
«yighip éytqanda, nijis tarixliridiki wehshiylik we qirghinchiliqlarni körüshni xalimaydighanlar buni yoshurushni meqset qilghan meynet hés - tuyghu oyunliridin héchqandaq netijige érishelmeydu, shundaqla tarix aldidiki jawabkarliqliridinmu hergiz qéchip qutulalmaydu.»
