jumhur reis erdoghan saylamda bélet tashlighan barliq kishilerge minnetdarliq bildürdi
jumhur reis rejep tayyip erdoghan 14 – maydiki saylamlarda bélet tashlash rékorti yaritish arqiliq milliy iradini eks ettürgen barliq puqralargha rehmet éytti.
türkiye awazi radiyosi xewiri: jumhur reis erdoghan ikki xususiy téléwiziye qanilining neq meydandin birleshme tarqitilidighan mexsus söhbet pirogrammisida, muxbirlarning küntertiptiki mesililerge munasiwetlik soallirigha jawab berdi.
tallishining qaysi yönilishte bolushidin qetiynezer, 14 - maydiki jumhur reislik we parlamént ezaliri omumiy saylimida awaz tashlighan her bir puqragha minnetdarliq bildürgen erdoghan, türkiyege yarishidighan nahayiti katta démokratiye bayrimi ötküzülgenlikini, buning belkim dunyada körülüp baqmighan ehwal bolushi mumkinlikini éytti.
u xelq namayan qilghan takamulluqning alahide teqdirleshke erziydighanliqini tekitlep: «saylamdiki bélet tashlash nisbiti %90 ke yetti. men yene siyasiy ishtirak qilish küchini ashurush, démokratiyege ige chiqish üchün küch serp qilghan barliq siyasiy partiyelerge, namzatlargha, metbuat – tarqitish orunlirigha, saylam jeryanida wezipe ötigen bixeterliktin tartip edliye xadimlirighiche bolghan her qaysi idare – organlarning barliq xizmetchilirige rehmet éytimen. saylanghan barliq ezalarni tebrikleymen we ulargha utuq tileymen» dédi.
jumhur reislik saylimining birinchi aylanmisida xelqning özige bolghan mayilliqini zor derijide ipadiligenlikini tekitligen erdoghan, xelqning mejlis (parlamént) timu köp sanliqni jumhur ittipaqigha bergenlikini éytti.
«awaz sanduqida namayan bolidighan irade béshimizning üstide» dégen erdoghan, 28 - may ötküzülidighan jumhur reislik saylimining ikkinchi aylanmisighimu saylighuchilarning köplep qatnishishini ümid qilidighanliqini bildürdi.
14 - maydiki jumhur reislik saylimigha qatnishish nisbitining %88.52, parlamént ezaliri saylimigha qatnishish nisbitining %87.40 bolghanliqi élan qilindi.
