جۇمھۇر رەئىس نامزاتلىرىنىڭ ھېچبىرى يېتەرلىك ئاۋازغا ئېرىشەلمىدى

تۈركىيە ئاۋازى رادىيوسى خەۋىرى: ئالىي سايلام كېڭىشىنىڭ باشلىقى ئەھمەت يەنەر جۇمھۇر رەئىسلىك سايلىمىدا نامزاتلارنىڭ يېتەرلىك ئاۋازغا ئېرىشەلمىگەنلىكىنى، 28-ماي (يەكشەنبە) ئىككىنچى ئايلانما جۇمھۇر رەئىسلىك سايلىمىنى ئۆتكۈزۈشنىڭ قارار قىلىنغانلىقىنى بىلدۈردى.

ئۇ دۆلەت ئىچىدە سايلام ساندۇقلىرىنىڭ %100 تولۇق ئېچىلغانلىقىنى، دۆلەت ئىچى سايلامغا قاتنىشىش نىسبىتىنىڭ %88.92 كە، چەت ئەللەردىكى تۈركىيە پۇقرالىرىنىڭ سايلامغا قاتنىشىش نىسبىتىنىڭ %52.69 كە يەتكەنلىكىنى قەيت قىلدى.

ئۇ رەسمىي بولمىغان نەتىجىلەرگە كۆرە، رەجەپ تاييىپ ئەردوغاننىڭ %49.51، كەمال قىلىچدارئوغلۇنىڭ %44.88، سىنان ئوغاننىڭ %5.17، مۇھەررەم ئىنجەنىڭ %0.44 ئاۋازغا ئېرىشكەنلىكىنى ئەسكەرتتى.

رەسمىي بولمىغان دەسلەپكى نەتىجىلەرگە ئاساسلانغاندا، پارلامېنت ئەزالىرى ئۈچۈن تاشلانغان ئاۋازلارنىڭ %99.86 نىڭ تارقىلىشى تۆۋەندىكىچە:

جۇمھۇر ئىتتىپاقى %49.46

ئادالەت ۋە تەرەققىيات پارتىيەسى %35.58

مىللىيەتچى ھەرىكەت پارتىيەسى %10.07

مىللەت ئىتتىپاقى %35.02

جۇمھۇرىيەت خەلق پارتىيەسى %25.33

ئىيى (ياخشى) پارتىيە %9.69