түркийәниң хартумдики дипломатлири судан портиға орунлашти

түркийә авази радийоси хәвири: дөлитимиз (түркийә җумһурийити) ташқи ишлар министири мәвлүт чавушоғлу суданда 15 – апрелдин буйан давамлишиватқан тоқунушлар түпәйли түркийәниң хартумдики әлчиханиси хадимлириниң порт судан (судан пурти)ға йетип барғанлиқини билдүрди.

судандики тоқунушларниң коча урушлириға айлинип кәткәнликини билдүргән чавушоғлу, түркийәниң хартумдики әлчиханиси җайлашқан мәһәллә вә кочиларда шиддәтлик тоқунушларниң давам қиливатқанлиқини ейтти.

у әлчиханини вақитлиқ судан портиға йөткәшни қарар қилғанлиқлирини, әлчихана хизмәтчилириниң бүгүн судан портиға йетип кәлгәнликини билдүрди.

министир мәвлүт чавушоғлу 6 - май көчүшкә тәййарлиқ қиливатқан җәрйанда әлчихана машинисиға оқ чиқирилғанлиқини, нурғун оқниң әлчихана машинисиға тәгкәнликини әскәртип: «улар һәтта техиму күчлүк қоралларниму синап бақти. айропиланимизму һуҗумға учриди. әмәлийәттә, биз бу йәрдә тәрәп тутмаймиз. һәр икки тәрәпниң бизгә һөрмити бар. гойа бу йәрдә башқа бир күч бизни ишниң ичигә сөрәп кирмәкчи болуватқандәк қилиду. у йәрдә ғәрбликләр бар, тәрәп тутуватқан район дөләтлириму бар» дегәнләрни сөзлиригә илавә қилди.